Ayaw'g gamita ang SPEED sa pamolitika

Nasayod na ko sa tinuoray'ng rason ngano nga si Mayor Tomas Osmeña wala usa molingkod sa pagka mayor karong panahona. Balido ang iyang rason apan sigun sa among gikasabotan, dili kini ibutyag sa publiko.

Aw, tingali kon moabot na ang tukma nga panahon basin og motugot na si mayor Osmeña nga ibutyag ang rason ngano nga mi-file una siya og leave of absence sa katungdanan.

Apan nasayod ko nga si Mayor Osmeña dili g'yod mo-resign. Gani sigurado ko nga mobalik siya sa katungdanan kon moabot na ang panahon.. Karong Oktobre 31, mapupos na usab ang usa ka buwan nga leave sa mayor, apan mora'g tan-aw nako si Mayor Tom, molugway pa og mga adlaw.

Ang ako lang ikasulti, husto g'yod si Mayor Tom sa iyang hukom.. Ang gihatag niya nga rason sa pag-leave mao nga dili magduda ang katawhan nga ma-inpluwensyahan ang imbistigasyon sa pasangil nga nanghulga'g babaye ang bugtong niyang anak.

Sa akong tan-aw, dili tinuod ang pagtoo sa uban nga mi-leave si Osmeña pagka mayor kay gitambagan sa iyang doktor nga papahuwayon g'yod.Dili usab tinuod nga mi-leave si Tommy kay aron makahimo siya og hugot nga pasiunang kampanya sa south district, diin siya anha magpapili pagka kongresista sa eleksyon karong sunod tuig.

Pagka karon, si Osmeña mora man lang gihapon og mayor, ang nakalahi lang kay wala siya mamirma og mga dukomento.

Sa daghang kalihukan nga akong gitambongan, nagkatagbo kami si Osmeña, sama sa tigum sa mga konsehal didto sa Waterfront Hotel, ug sa tigum sa mga urban poor sa Grand Convention Center niadtong Sabado.

Padayon usab ang iyang pakig-dialog sa mga investors nga gustong mobutang og puhonan diha sa South Road Properties. Kon tinuod pa nga ang tumong ni Tommy pag-leave mao ang pagpahugot sa kampanya sa south district, gihurot unta niya ang iyang kampanya pagsuroy sa distrito.

Kon ibutang usab nato nga tinuod pa nga gimandoan siya sa iyang doktor nga papahuwayon, wala unta magsige og suroy ang mayor. Nindot unta nga itug-an ang rason g'yod ni Tommy pag-leave, apan pagka karon "off the record" lang kuno usa.

Sa among seminar sa media atol sa Press Freedom Week, ang ethics sa media maoy gihisgotan ug usa niini mao ang pagtahod sa "off the record" request sa mga news sources.

Sagdi lang, inig-abot na sa tukmang panahon, hangyoon nako ang mayor nga tugotan ko niya nga makabutyag sa tinuoray'ng rason sa iyang pag-leave sa katungdanan.

* * *

Kini bitaw nga paggamit sa mga sakop sa Squatters Prevention Encroachment Elimination Division (SPEED) sa pagpanangtang sa mga basketball board nga gipanag-iya sa oposisyon nga gitaud sa lainlaing dapit, dili g'yod maayo.

Angay'ng mauwaw ang mga opisyal nga mohimo niini. Kini maoy makahatag og rason sa mga sakop sa SPEED, ilabi na sa ilang hepe nga si Vicente Mercado nga makarason nganong wala sila'y agi ug walay nahimo sa paglimpyo sa atong aseras gikan sa mga tawo nga nagsamok-samok sa atong paglakaw.

Kon duna mo'y mga basketball boards nga ipatangtang, kay ang rason iya kini ni congressional aspirant Jonathan Guardo, pasagdi ang mga opisyal sa barangay nga maoy mohimo niini. Ayaw og gamita ang mga sakop sa SPEED.

Ang maayo hinoon ninyong buhaton mao nga inyong mandoan ang SPEED nga paspasan sa paglimpyo sa atong mga aseras. Gub-on ang mga gipangtukod sa aseras nga maoy makaingon nga ang mga tawo anha na molakaw sa karsada.

Unsa, kamong mga opisyal sa dakbayan wala ba kamo makakita niining maong mga talan-awon? Mga buta ba kamo kon magsakay sa bugnaw ninyong mga sakyanan nga iya sa kagamhanan?

Mosimpatiya usab ko ni Guardo, kana kon tinuod man ang iyang giingon nga bisan ang mga basketball boards nga gitaud diha sa mga private lots sa kabarangayan giapil sa pagpanangtang.

Kining mga politiko god dunay iya-iya nga pamaagi sa pamolitika. Sama sa mga opisyal sa dakbayan, nagmugna kamo og MY City, ang inyong sports program.

Sama didto sa Bulacao, ang anak ni kanhi konsehal Rodolfo Cabrera nangayo og bag-ong basketball board sa City Hall aron ihulip sa gabok na nga board sa ilang dapit.

Giendosar kini ni Konsehal Joey Daluz nga pahatagan og basketball board, apan dugay man kaayo mao nga nangayo sila ni Guardo, ug diha-diha gihatagan dayon.

Unya kon anaa na ang basketball board ni Guardo inyong tangtangon?

Awhag usab nako sa mga sakop sa SPEED, trabaho kamo basi sa gitahas kaninyo, dili kay magpagamit kamo sa politika!