FB ni Bea

Di mi "friends" ni Samantha Diores Benitez sa Facebook. Apan "friends" ming Ana Gabriela Beatriz Villegas. Nakakita ko sa mga hulagway sa nabuslot nga digital camera ug sa nanghulga nga text message nga gi-upload ni Sam tungod sa "link" nga gipada sa ilang higala nga namantala sa "wall" ni Bea.

Mao ni alas sa social networks batok sa tradisyonal nga media. Si bisan kinsa direktang makapahibawo sa iyang "friends" unsay iyang gibati o, sa kaso ni Sam, unsay nakapahadlok niya. Di sila kinahanglang magpatawag og press conference. Ni mag-press release. Ning maong kontrobersiya, tukma ang paghulagway sa karaang media nga "...so last season."

* * *

Way FB account si Miguel Osmeña. Mao nga sa ilang mga hulagway ni Bea wa siyay "tag." Nga namugna sa FB aron sayon nga saw-an sa iyang 300 milyones ka mga sakop ang ilang mga hulagway. Ang "profile picture" ni Bea naglakip ni Miguel sa background.

Wa say FB account si Cebu City Mayor Tomas Osmeña. Apan duna siyay "fan page." Nga dunay 156 ka fans. Usa nila si Bea. Namantala sa page ang mga hulagway sa mayor, sa labong pang iyang buhok ug dihang upaw na. May mga hulagway sab sa nagpaupaw niyang mga dumadapig. Nasuwat nga giusab ni Osmeña, o sa naghimo sa pahina, ang iyang "gender," birthdate" ug "hometown." Wa hinuoy hisgot sa kontrobersiya sa iyang anak.

* * *

Mas limitado ang kasayuran sa FB account ni Sam. Kay pribado ang iyang profile. Pinili lang ang makalili. Apan gihimo niyang "public" ang lima ka hulagway sa iyang digicam ug cellphone sa folder nga giulohan og "Hello Psycho" tungod sa iyang kahadlok ug tinguha nga mahibaw-an sa tanan ang pagpanghulga nga iyang nadawat.

Hangtod sa akong pagsuwat ini, ang mga hulagway nakadawat nag 92 ka "comments." Ang labing una nahimo alas-2:31 sa hapon niadtong Dominggo. Apil ang pipilang nagbalikbalik ug ang tubag ni Sam nila. Kasagaran nipaluyo ni Sam ug nisaway nilang Miguel ug Bea.

* * *

Pipila sa mga komentaryo nisuyla sa FB account ni Bea. May pipila gani nga nireklamo nga gi-"delete" ni Bea ang ilang mga pagsaway. Gipasanginlan nila si Bea nga maoy nipasuko ni Miguel batok ni Sam. Gipasagdan hinuon ni Bea ang "links" sa mga hulagway ni Sam nga niabot na sa ubang social networks, sama sa Multiply.

Apan kon basehan ang kalihokan ni Bea sa FB, wa siya magpada sa kontrobersiya. Nagduwa siya og "Bejeweled Blitz" ug ni-"subscribe" siya sa alas-10:57 niadtong Martes sa gabii sa chuvadotcom sa NetworkedBlogs. Kansang labing bag-ong entries naglakip sa "A girl's quest to kiss 100 men," nga may mga hulagway sa pakighawok sa 27 anyos nga si Yan Ya Ching sa 54 na ka lalaki, ug "Kim Chiu is all grown up!"

* * *

Email:[email protected]