Abusadong daku!

Nasundan nako kagahapon didto sa V. Sotto Street ang usa ka puti nga pick-up nga ang plate numbers XMJ-926.

 Kon kinsa man ang nag-drive sa maong sakyanan, angay ka nga mauwaw tungod kay abusado kaayo ka nga nagmaneho sa imong sakyanan.

Kini maoy resulta sa pagsuspenso ni LTO chief Arturo Lomibao sa mga deputized agents nga makapanakop sa abusadong drayber.

Ang V. Sotto Street atubangan nga bahin sa Commission on Audit regional office dunay gibutang nga "double solid yellow lines" nga sa ato pa gidili ang pag-overtake subay sa pikas linya.

Unsay gihimo sa maong sakyanan? Kusog kini nga nagpadagan nga diha agi sa pikas bisan og "stop" pa ang signal sa eskena M. J. Cuenco Avenue ug sa duol na ang eskena, mikuliot kini sa ubang sakyanan nga diha sa tukma nga lugar.

Kon kinsa ka man nga drayber sa maong sakyanan, angay ka nga mauwaw sa imong gihimo. Kon wala pa gisuspenso ang pagpanakop sa mga LTO agents, nasakmitan ka na unta sa imong lisensya kagahapon.

* * *

Gawas sa maong sakyanan nga pick-up, misunod usab kadtong puti nga de-karga nga Department of Public Services (DPS) sa dakbayan.

Ang inyong kaabusado sa pagmaneho og sakyanan mosangpot ra g’yod nga makamulta mo’g dagko. Walay kaso kadtong drayber sa puti nga pick-up kay kwartahan tingali kadto.

Apan kadtong drayber sa DPS truck sigurado ko nga mohangyo g’yod kon madakpan.

Kaniadtong June 12, may gidakop ko nga drayber sa DPS garbage truck kay kusog nga nagpadagan subay sa pikas linya sa karsada bisan og ang karsada may double solid yellow line.

Unsa, ignorante mo sa balaud? Kamong mga opisyal sa kagamhanan, tan-awa usab ang dinad-an sa inyong mga drayber. Kon sila abusado pahamtangi og silot.

* * *

Ang mga opisyal sa Kapitolyo angay’ng mosuta kon kinsa ang giisyohan sa usa ka puti nga Multi-cab sa probinsya nga ang Plate Nos. SHW-736.

Ang maong multi-cab nga dunay "seal" sa probinsya diha sa kilid nga pultahan dapit sa drayber nakit-an nako nga gisakyan kaganiadtong Dominggo og mga tawo nga nangompra og mga kahoy gikan sa usa ka tindahan sa T. Padilla.

Dili ko motoo nga kadtong maong kahoy alang kadto sa Kapitolyo kay Dominggo man. Gusto lang nako nga masilotan kadtong mga tawo nga mopahimulos sa mga sakyanan sa kagamhanan alang sa ilang personal interest.

* * *

Unya, atensyon mga opisyal sa dakbayan sa Sugbo. Kinsa ba’y in-charge sa mga dump trucks nato? Duna ba kita’y project sa bukid unahan sa barangay Busay nga gihakotan ninyo og anapog?

Nasundan man god nako ang duha ka dump truck kaniadtong miaging semana nga nagkarga og anapog. Nahibulong ko kay diri man gikan sa ubos sa Lahug ang maong sakyanan paingon sa babaw sa bukid.

Ang usa sa maong mga dump truck dunay Plate Nos. nga SHT-779 samtang ang usa wala nako maklaro kay hugaw kaayo ang plaka.

* * *

Nasakpan sa Commission on Audit (COA) nga ang dakbayan sa Sugbo nakalapas sa tukmang lagda, ilabi na ang paggahin og budget alang sa bayad sa utang nga subra sa 20 porsiyento sa iyang kinitaan.

Ang nakaingon niini kay gidugay-dugay man sa pagbayad ang utang sa "loan" pagtukod sa City Hall annex building ug sa pagmugna sa South Reclamation Project.

Kini maoy nakaingon nga nahimo na hinoon nga tulo ang "loan" sa dakbayan ug ang bayranan niini kaniadtong 2008 miabot og P729,332,845 nga subra sa 20 porsiento sa iyang general fund budget nga P1.1 bilyones.

Nasakpan pa g’yod sa COA ang dakbayan nga wala motuman sa kondisyon sa Philippine Amusement and Gaming Corporation (Pagcor) sa paggasto sa donasyon niini sa dakbayan.

Tiaw mo nga ang uban sa maong salapi gigamit paghatag og transportation allowance sa mga court employees, pagpalit og mga air con alang sa mga national office, donasyon alang sa Sinulog mardi gras ug uban pa nga wala malatid sa kasabutan.

 Ako hinoon nasayod g’yod kon ngano nga ang uban sa atong mga abogado nga konsehal kusog man kaayo nga mohatag og mga "financial assistance" ug mamalit og laptop ug aircon alang sa korte.

Kamo wala diay mahibawo sa rason?

* * *

Email: [email protected]