Walay ospital ang probinsiya

Angay g’yod nga ang mga opisyal sa Kapitolyo magtukod og provincial hospital aron kadangpan sa mga lumolupyo sa kalungsuran nga makasinati og sakit.

Husto si Mayor Tomas Osmeña sa iyang pag-ingon nga samtang nanghambog si Gobernador Gwendolyn Garcia nga ang Kapitolyo karon daghan kaayo og katigayonan unya walay utang, apan wala kini’y provincial hospital.

Maayong hinuktokan ni Gwen kining maong punto. Ang Vicente Sotto Memorial Medical Center dili kini provincial hospital apan sagad sa mga kabus nga taga probinsiya anha diha modangop.

Dili ikahibulong nga anha magpunsisok sa DVSMMC ang mga pasyente gikan sa kalungsuran kay kon adto sila modangop sa mga district hospital sa lainlaing kalungsuran sa Sugbo, mangamatay lang sila.

Nganong sila mangamatay? Dili man kompleto og tambal ang mga district hospital. Mao nga sa nanglabay’ng katuigan ug mga buwan, ang mga taga probinsya nga may sakit, modangop lang sa Cebu City Medical Center.

Alang nako, ang pagtipig og daghang kuwarta apan kuwang ang pangalagad dili maayo. Ang nindot nga mga opisyal mao kadtong mohatag og pagtagad sa kahimtang sa panglawas sa ilang lumolupyo.

Kay hapit na man g’yod ang eleksyon, kini maoy tan-awa ninyo sa mga buot magpapili isip mga opisyal. Kon ako ang pagbut-on, dugangan nako ang budget nga P139 milyones alang sa CCMC.

Angay g’yod hinoon nga ibalanse nato ang pagserbisyo, apan kinahanglang hatagan nato og dakong pagtagad ang panglawas.

* * *

Mitingog na man lagi ang hepe sa CCMC nga si Dr. Myrna Go. Paundayoni na lang ang imong pagpakahilom Dr. Go, ayaw na lang pagtubag sa media kon pangutan-on ka.

Wala g’yod ko makagusto sa gipakitang batasan niining Dr. Go dihang buot nako siya kuhaan og pamahayag sa panagtagbo namo didto sa City Hall kay mora’g amang.

Ang tinuod, mora’g buotan nga pagkatawo kini si Dr. Go apan nagmogtok lang ang dagway, igo lang miingon nga si Konsehal Christopher Alix maoy ipapangutana. Ngano god tawon nga si Alix may imong patubagon sa isyu sa CCMC nga ikaw may hepe? Unsa may imong gikahadlokan Dr. Go?

Ambot kining mga opisyal diha sa CCMC talawan man kaayo manubag. Ipasa-pasa ka nila kon imo silang pakighinabian.

Dili g’yod mo sama ni Dr. Alice Utlang nga andam sa kanunay kon pakighinabian sa media mao nga wala hinoo’y isyu nga motumaw. Malipay ko nga ilisan ni mayor Tommy kini si Dr. Go kon dili niya usbon ang iyang batasan.

Sagdi lang, moatubang bitaw ni si Dr. Go sa konseho sa dakbayan ugma, maminaw ming mga reporters. Ayoha’g panubag Dr. Go ha?

Miawhag ka nga kadtong dunay reklamo mohimo og formal complaint? Duna nay duha nga mipirma og affidavits ngadto ni Konsehal Gerardo Carillo nga maoy mogaling nimo ugma og pangutana.

* * *

Tan-awon nato og madutlan ba sa Land Transportation Franchising and Regulatory Board ang Ceres Bus company nga gireklamo ni Roberto Librando Jr., ang manager karon sa Librando bus line.

Gireklamo ni Librando ang Ceres kay matud pa wala kini motuman sa tukmang pletehan.

Makaayo hinoon sa mga sumasakay ang gihimo sa Ceres kay gipakubsan man nila ang pletehan, apan ang reklamo ni Librando mao nga “mangamatay” niini ang ubang bus company.

Unya kon ang Ceres na lang ang mahabilin nga magdagan, aw anha pa sila nga posibleng mopamahal sa pletehan.

Huwaton nato kay matud ni LTFRB regional director Romulo Bernaldez, hangtud karong hapon na lang ang tagal nga gihatag niya ni Atty. Jose Douglas Sanson nga humanon ang iyang imbestigasyon.

* * *

Nakabantay g’yod ko nga daghan na kaayo karon ang mga abusadong drayber human nga gipahunong ang operation sa mga LTO agents. Ang tinuod, dili man mahadlok ang mga drayber sa citation tickets kay dili man masakmit ang ilang lisensya.

Maayo unta og makaisyu na ang LTO chief og bag-ong mga deputization ID sa mga LTO agents aron makapadayon na sila pagdisiplina sa mga abusadong drayber.

* * *

Email: [email protected]