Political will

Husto ang sugyot sa usa ka kanhi senador nga kon daku man og kuwarta ang kagamhanan sa probinsya, mas maayong palamboon niini ang serbisyo sa katawhan – ilabi na ang pagpalambo sa mga district hospital.

Kon tinuod man nga dunay plano ang mga opisyal sa Kapitolyo pagpalambo sa mga district hospital sa probinsya, kanus-a pa man?

Suheto kaayo ko nga ang mga district hospital wala kaayo maatiman og kuwang kini og mga tambal. Tungod niini kon dunay masakiton gikan sa kalungsuran, dad-on g’yod ni dinhi sa dakbayan.

Gipagarbo man god pag-ayo ni gobernador Gwen Garcia nga ang assets sa probinsya nagkantidad na karon og kapin sa P40 bilyones ka pesos.

Akong awhag sa higala ko nga si Atty. Rory Jon Sepulveda nga unta tambagan niya si Gwen nga palamboon ang mga district hospital.

* * *

Sa hilom bilib g’yod hinoon ko aning Gwen kay estrikto nga mopatuman og mga balaud. Diha lang sa Kapitolyo, unipormado nga may neck-tie pa ang mga lalaki nga kawani.

Unya estrikto si Gwen sa mga kawani nga maglakwatsa atul sa office hours. Sa City Hall daghang mga kawani nga usahay makit-an nako nga nagsuroy-suroy sa downtown.

Si Mayor Tomas Osmeña estrikto usab, apan ang nakaapan lang kay usahay molaban kon iyang supporter ang nalambigit. Mao kini ang angay’ng tan-awon ni Tommy.

Dunay mga kawani nga gitangtang ni Tommy kaniadto kay nalambigit kini og mga kontrobersiya sama sa graft and corruption, apan tan-awa naa gikuha gihapon ug nagtrabaho karon sa City Hall.

Ganahan unta ko ni Tommy kay estrikto, apan wala man madutli sa iyang kaestrikto ang ubang department head sa City Hall nga minus og accomplishment.

Nakadungog pa ba kamo nga dunay accomplishments ang Bantay Dagat Commission ubos sa pagdumala ni Koronel Cesar Enriquez?

Dihang gitudlo si Koronel Enriquez nga hulip sa gipatay nga si Elpidio “Jojo” dela Victoria, nalipay ko kay opisyal god siya kaniadto sa AFP-Visayas Command, apan wala may kalampusan.

Diha pa gani’y pasangil nga gibaligya ni Enriquez ang duha ka makina sa pumpboat nga nasakmit kaniadto sa kampanya sa illegal nga pagpangisda, apan wala lang ipaimbestigar ni Tommy.

Dunay suod kaayo ni Tommy nga mihunghong nako nga lig-on kayo ang tawo nga “backer” ni Enriquez. Kinsa kaha siya no? Alang ni Enriquez angay siya nga mopakita og kaabtik.

Ang katawhan, ilabi na ang mga sakop sa media, naniid ra kinsa ang mga opisyal sa City Hall nga nagtrabaho.

* * *

Taud-taud na nga gihunongan nako paghisgot ang isyu kabahin sa mga manindahay og imahen sa mga santos luyo sa Basilica del Santo Niño kay malooy lagi ta nga ila kining panginabuhian.

Apan paniid nako duna may daghang tindera nga miabuso na g’yod pag-ayo. Balikon nako nga ang ilang baligya dili g’yod gani unta ipaabot sa gibutang nga puthaw nga railings.

Apan naunsa ba nga ang uban anaa na man maninda gawas sa railings. Unya, nagbutang pa og tulda nga nakababag na sa mga moagi nga sakyanan ug mga pedestrians.

Husto ba kini Major Vic Mercado? Maayo tingali nga tangtangon ninyo ang mga tulda nga ilang gibutang ingon man sakmiton nga dili na g’yod iuli ang ilang mga baligya nga ibutang sa gidili nga lugar.

Awhagon usab nako nga moaksyon niini si Gerry Marquez, ang consultant sa urban poor, nga abtik kaayong moapil kon dunay operasyon sa SPEED.

Unsa may trabaho anang unom ka kawani sa City Hall nga nag-uban-uban kanimo Mr. Marquez kon dili nimo patrabahoon? Unsa gihimo ba kana nimo sila nga mga bodyguard? Daghan sa mga City Hall reporters dili na ganahan nga mo-interview nimo Mr. Marquez kay nabantayan nila nga sulti ra man kutob ang imo, sama sa gipasalig nimo kaniadto nga himoan og aksyon ang mga abusadong Sto. Niño image vendors, apan wala g’yod.

Busa karon angay nimo nga imatuod nga wala ka mag-usik-usik sa imong suweldo nga P18,000 ang buwan.

Higala nako kini si Mr. Marquez kaniadto, apan ang panaghigala dili nako himoong basihanan nga akong likayan ang pagsaway sa iyang mga kakuwangan.

Sama god ni Mayor Tommy, giisip nako nga higala ang mayor kay magbayloay man gani kami og text messages, apan nakita ninyo nga sawayon nako siya kon sa akong tan-aw duna siya’y kakuwangan.

Busa, lihok Mr. Marquez. Si higalang Major Mercado, palihoka usab ang imong mga sakop, sir.

* * *

Email: [email protected]