Unsay inyong mga sayop

Hapit na mapupos ang tagal sa pagpanawat og aplikasyon alang niadtong gusto nga mopahimulos sa firearms amnesty nga gitanyag sa kagamhanan sa mga tawo nga dunay armas nga walay lisensya.

Apan ang statistics nagpakita nga gamay pa g'yod kaayo ang mipahimulos sa amnesty program. Unsaon nga pwerte na mang mahala sa bayad.

Sayop sa kadagkoan sa Camp Crame kay ilang gipaumentohan ang kantidad sa license fee gikan sa P2,000 ngadto na sa P3,000 sa mga low-powered handguns, ug P5,000 sa high powered.

Unya, ang mga application dugay pa g'yod nga maasikaso didto sa Firearms and Explosives Office sa Camp Crame.

Ako lang, miaplay ko 2005, apan napupos na lang ang duha ka tuig nga termino, wala g'yoy balita og naunsa na ang akong application. Mibayad na lang ko og "renewal fee" ug maayo gani kay natabangan kong PNP chief Avelino Razon sa wala pa kini maka-retire.

Kini maoy punto nga angay'ng hatagan og pagtagad sa kadagkoan sa FED. Kabahin sa kantidad, usa kini sa makapa-discourage kay sayonan ka og P3,000 ngadto sa P5,000.

Unya, kadtong mga sakop sa Barangay Intelligence Network (BIN) nga hilig kaayo nga magdala og armas, palisensyahi ninyo ang inyong armas kay salikwaot kaayo nga kamo moabag kunohay sa kapolisan sa pagpanakop unya utro pa kamong mga dakponon. Dili ba hilas huna-hunaon?

* * *

Ang publiko andam mosabot sa "inconvenience" nga ilang masinati diha sa mga balay-patigayon, ilabi na og masabtan nila nga ang inconvenience mugna sa proyekto nga gitumong aron nga mapanindot pa niini ang serbisyo sa umaabot nga panahon.

Apan kon ang inconvenience moresulta na sa posibleng kadaut sa panglawas sa katawhan nga ilang mga customers, dili na kini maayo og angay na kining sawayon.

Ingon niini ang nasinati sa Colonade, usa ka tindahan dinhi sa dakbayan. Dili kini pagdaut sa maong tindahan, apan ang akong tumong mao nga masayod sila nga daghan ang wala makagusto sa ilang pagpabaya.

Nangompra man god ko sa maong tindahan mga alas 12 ngadto sa alas dos sa hapon, daghan na ang nagbagolbol kay samtang dunay nag-trabaho sa pikas kabahin sa ilang renovation, ang baho sa kemikal nga daw pintal ba kaha kadto, misulod sa tindahan.

Unsaon nga ang gwardya nga gidestino sa pultahan sa ilang grocery sa Manalili side, gisige ra man og abli ang pultahan. Ang mga nagdumala sa grocery wala usab magtagad.

Apil sa nagbagolbol ang mga kawani mismo sa tindahan, apan miutong-utong na lang. Ako wala g'yod makaikyas, nag-ubo-ubo ko sa lain kaayong baho nga mora'g pintal o unsa ba kadto nga kemikal.

Kamong mga nagdumala sa Colonade, kay dugay-dugay pa ra ba g'yod nang inyong renovation, siguroa g'yod nga dili na kadto mahitabo pag-usab aron walay makasaway ninyo.

Gisirad-an nila ang pultahan diha na nga mireklamo na ko. Madaut tawon ang panglawas sa inyong mga customers ug sa inyong mga trabahador.

* * *

Husto si Koronel Patrocinio Comendador nga kinahanglang ang mga polis kanunay g'yod nga magsul-ob og nindot nga uniporme.

Matud pa ni Comendador nga unsaon pagkuha sa respeto sa mga polis kon ang ilang dagway mas karespetahan pa ang mga kriminal. Ang termino ni Comendador nga "nagkagidlay" lang ang ubang polis.

Sayo kaayo si Comendador kagahapon nga mihimo'g inspection sa mga polis nga nadistino sa Punta Princesa police station. Isip police reporter sa taud-taud na nga katuigan, suheto ko nga tinuod ang obserbasyon ni Comendador.

Tinuod, dili man g'yod kinahanglan nga mag-uniporme na lang ang tanang polis apan kon magsul-ob mo og uniporme tan-awa usab kon unsay inyong dagway.

Labi pa og mag-checkpoint mo, ayoha nga karespetohan ang inyong pustora. Kay manakop man mo og mga mag-motor nga walay crash helmet, ayaw usab mo pagbuhat niini.

Kinahanglang mo-set mo og maayong ehemplo.

* * *

E-mail: [email protected]