Sinulog sa taripa

Kuwang na lag dyutay nga mag-piyesta ang Malakanyang sa pagdalidali pagpatawag og press conference aron pagpahibawo nga nisugot ang mga kompaniya sa lana paglaslas sa presyo sa diesel baleg P1.50 matag litro. Matod ni Press Secretary Jesus Dureza nga nakumbinser ang mga kompaniya sa lana sa hangyo ni Pres. Arroyo. Ang salida sa Malakanyang, nga klarong gitumong pagkumbinser sa katawhan nga si Arroyo sa makausa pa nakaluwas na sab nila gikan sa laing katalagman, igo lang makapatumaw sa dakong papel ni Arroyo pagmugna sa bangis nga katalagman.

Gawas nga di kapangangkon sa papel pagka manluluwas, kay igo na man lang siyang nanghangyo, si Arroyo kapaninglan hinuon sa katawhan nga mao ra say nagtugot sa mga kompaniya sa lana pagbuutbuot pagtakda sa presyo sa lana. Gawas nga matag saka sa presyo, mag-atang na sang mga kolektor ni Arroyo pagkuha og mas dakong Evat.

* * *

Sa di pa siya magsayaw-sayaw sa kadalanan pagpangangkon nga naibanan niya og katunga ang makalilisang-ug-labing-dako-sa-way-kinutoban-nga-matag-semana nga usbaw sa presyo sa diesel, angayng hunghongan si Arroyo sa iyang mga itoy nga ang pagsugot sa mga kompaniya sa lana sa iyang hangyo may sagol nga insulto. Kay nipasidaan ang Shell ug Petron nga ila ra gihapong bawion ang P1.50 nga ilang gius-os. Sa ato pa, malangay lang og pila ka adlaw ang atong kalbaryo. Way makababag sa ilang pagtumpi sa ilang ginansiya.

Nga nitakdo sa gibisto ni Kongresista Eduardo Gullas sa unang distrito sa Sugbo. Niburot pag-ayong ginansiya sa mga kompaniya sa lana sukad napatuman ang oil deregulation law. Ang Shell ug Petron nakakumkom og P70 bilyones nga ginansiya sa unang napu ka tuig nga pagpatuman sa balaod. Nipasidaan si Gullas nga ang mga kompaniya sa lana nagpahimus karon sa gahom, nga mahimo nilang abusohan, pagtakda sa presyo aron nga mas moburot pang ilang ginansiya. Giawhag ni Gullas ang Malakanyang pagsusi sa posibleng pangabuso.

* * *

Ang bag-ong taripa sa plitehan nga giluwatan sa LTFRB morang Sinulog-may kategoriya sa free interpretation. Tungod sa kataphaw sa sukdanan sa nagkalainlaing mga ruta, ang mga drayber nag-iyahay paghubad pila ang tukmang distansiya sa ilang gisubay nga mga ruta. Ug kay ang mga pasahero duna man say ilang kaugalingong hubad, ang pag-ulbo sa lalis di gyod kalikayan.

Unsay tubag sa LTFRB ug LTO? Pagarpar, sama sa naandan:

• Ang LTFRB nipasalig nga magtinabangay sila sa Citom pag-usab sa karaang mga sukod nga ang kasagaran sa mga ruta moagi pa sa Cebu City Hall. Karon mas daghan nang mga ruta nga moagi sa dagkong shopping malls.

Ang LTO nidangop sa ilang puol nang awhag nga pasumbungon ang mga pasahero sa ilang buhatan; apan mas brayt sa math ang mga pasahero-mas dako ang ilang alkanse kon moplite pagreklamo sa buhatan nga mas gikaintapan sa kakurakot ug kainutil.

* * *

Email:[email protected]