Mga tubag ni Lozada

Si Rodolfo Noel Lozada Jr. nakasugat sa labing lisod nga mga pangutana sukad sa pag-ulbo sa iyang NBN-ZTE exposé sa iyang pagtambong sa KBP Media Forum nga giapilan sa mga magsisibya sa Sugbo, Bohol ug Negros Oriental. Inay molihay, gitubag ni Lozada ang maong mga pangutana. Nga maoy nakalahi niya sa mga turutot sa Malakanyang nga nagtinabangay pagdaot niya.

 Apan si Lozada kahibawo sab mobalibad sa ubang mga pangutana. Labi na kun ang mga tubag mahimong gamiton batok niya. Hugtanon siyang nagdumili pagtubag sa pangutana angay na bang palagputon si Pres. Arroyo. Ug nagdumili sab pagkumpisal sa ubang kasal-anan nga wa pa niya ikatug-an. Gawas lang kun ang nangutana mokuyog sab pagpangumpisal uban niya.

* * *

Sa pangutana ni KBP Cebu Legal Counsel Cynthia Barte duna ba siyay laing ebidensiya gawas sa iyang testimoniya sa kahiwian sa NBN: Nipasabot si Lozada nga ang iyang testimoniya usa na ka matang sa ebidensiya; ug mahimong mopakita siya og dugang mga ebidensiya kun may mapasaka nang mga kaso sa hukmanan.

Sa pangutana ni KBP Cebu Auditor Manny Galecia kun unsay kalainan sa pangawkaw sa NBN-ZTE ug sa iyang pangawkaw sa Philippine Forest Corp. (PFC): Si Lozada nipasabot nga ang iyang atraso sa PFC ikatandi sa pagkuha sa ballpen sa usa ka tinun-an; samtang ang pangawkaw sa NBN-ZTE ikatandi sa pagdagit sa tinun-an mismo.

Sa pangutana ni KBP Regional Coordinator Edward Abad kun wa pa ba siya maapektahi sa mga pagdayeg gikan sa mga tulonghaan ug mga lalawigan nga iyang naduaw ug nadiskursohan: Si Lozada niingon nga di sayon ang iyang kahimtang karon; nga di siya magpapili sa bisan unsang politikanhong buhatan; ug nga wa siya manghagad apan siyay gidapit sa mga tulonghaan ug mga lalawigan nga iyang giduaw.

* * *

Si Lozada wa kalimot sa iyang kasiaw. Gihulagway niyang "bombastic" si Ike Durano II sa DYRF nga nangutana unsaon pagkab-ot ang iyang gitinguhang kausaban, sa malinawon bang protesta o sa duguong rebolusyon? Giangkon nga gitawag niyang Artsidyosesis sa Sugbo nga "Artsidyosesis sa Malakanyang," apan gibawi nga nagkomedya lang siya.

Nitug-an si Lozada nga nakaduaw siya sa Sugbo gikan sa iyang biyahe sa Bohol niadtong Enero ning tuiga, pila ka adlaw sa wa pa molarga sa Hong Kong, sa wa pa dagita sa NAIA ug sa wa pa motahan sa Senado.

* * *

Labing makahuloganon ang tubag ni Lozada sa mga tawong nituo sa iyang exposé apan di ganahang mapalagpot si Arroyo tungod sa kahadlok nga mopuli si Noli o si Erap:

Matod niya ang labing dakong kadaot sa pangurakot sa kagamhanan ug sa katilingban di ang pagkawkaw sa katigayonan sa katawhan kun dili ang paghikaw sa ilang katakos sa pagpangandoy alang sa mas maayong ugma.

* * *

Email:[email protected]