Damgo sa kausaban

Ang pagpamihag ni Armando Ducat Jr. sa mga bata ug mga magtutudlo aron pag-awhag sa edukasyon sa kabos nga kabataan, pagpalambo sa housing, pagtunglo sa pagpangilad sa mga politiko sa mga botante atol sa nagpadayong kampanya sa piniliay ug pagpangurakot kon makalingkod na sa katungdanan ug pagpahinumdom sa katawhan nga angay’ng mauwaw sa ilang kaugalingon tungod sa naghitak nga kalapasan sa mga kamandoan sa Labaw’ng Makagagahom, samtang di mahimong kapanalipdan tungod sa kadako sa risgo ug kahasol ngadto sa mga biktima ug sa ilang mga tagtungod, nakapapugwat sa katawhan, ug hinaot makatandog sab sa mga nagtungkawo sa katungdanan, sa kadako ug kadinalian sa panginahanglan sa matinud-anong kausaban.

Bisan unsa pay motibo ni Ducat sa iyang gibuhat, kay namihag man sab siya og duha ka pari sa Manila 20 ka tuig nang nilabay, ang iyang mensahe makatandog sa matag kasingkasing nga nangindahay og kaangayan kay haom ug makahuloganon sa pait nga kahimtang sa nasud ug sa katawhan, kansang kinabag-an hagbay rang nitahan.

* * *

Napugwat sang kinabag-an sa katawhan dihang pundok sa batan-ong mga sundawo nisakmit sa Oakwood sa Makati, nibutyag sa paghikaw sa labing batakang mga panginahanglan ug panaugdaog nga nahiagoman sa kasundalohan nga gilawog sa natad sa panggubatan ug nidemanda sa paghunong sa lapad nga pangurakot sa Armadong Kusog ug sa tibuok nasud. Gipakpakan sa kinabag-an sa katawhan ang ilang kaisog ug kaandam nga magpakamatay alang sa nasudnong kaligdong ug kadungganan.

Hangtod nga nabutyag nga may kalambigitan ang ilang pag-alsa sa mga hinanib sa napalagpot nga si kanhi presidente Joseph Estrada. Ang ilang pagkabuak-buak ug panag-unay nakapahugno ug nakapawong sa nisilaob na untang paglaom sa kausaban nga ilang gidagkotan ug nakapatugbaw sa makausa pa sa sakit nga kamatuoran nga ang kanser sa katilingban nakakuyanap na nga si bisan kinsang mangahas pagbabag ini mameligro nga igo lang lamyon.

* * *

Ang di-kabalibarang aghat sa pagbarug alang sa kausaban ug pagpakabana alang sa katarung taliwa sa lapad ug makabungog nga pagpahimus sa mga naa sa gahom ug pagpangiyugpos lang sa kinabag-an nga mga biktima sa kahiwian mao say nakatukmod ni kanhi gobernador Vicente "Tingting" dela Serna pagputol sa iyang pagpahuway sa politika. Human nahibawo sa hostage drama gahapon, si dela Serna niingon nga mas grabe ang "igo" ni Ducat kay niya ug nitiaw pagsugyot nga angay sang bihagon ang lokal nga mga opisyal nga nagpakauwaw ug nangyatak sa katungod sa mga Sugbuanon.

Ang nasud ug ang katawhan kinahanglang pukawon matag karon ug unya sa balaanong kamatuoran nga ang kadaotan, bisan unsa kabangis ug kagamhanan, di molahutay ug sa kapulihay mapukan ra gihapon sa katarung. Samtang ang pagpangiyugpos makapainat sa ataon nga kangitngit, ang pagpakabana makapadali sa gikahidlawan nga banagbanag sa bag-ong ugma.

* * *

Email: [email protected]