Isog ug ligdong

Angayan gyod nga pasidunggan ang duha ka labing taas nga mga opisyal sa kapolisan sa Central Visayas sa ilang hugtanong pagdumili pagdawat sa kontrobersiyal nga surveillance cameras nga gipanaod sa kadalanan nga giagian sa heads of state ug ubang mga delegado sa niaging Asean Summit nga gipahigayon sa niaging buwan dinhi sa Sugbo. Kon tuohan ang mga pasangil sa pangurakot sa transaksiyon, makapanakla tang maghunahuna sa gidak-on sa mga haylo ug kakusganon sa mga pamugos nga nahiagoman nilang PRO 7 Director Silverio Alarcio Jr. ug Deputy Director Lani-O Nerez.

Atubangan sa pasangil nga 15% ang komisyon sa P89 milyones nga gigahin alang sa proyekto, ug sa katagbaw ni PNP Chief Oscar Calderon, ambot tungod ba sa kakuwang sa kasayuran o sa kanihit sa kaligdong, sa katakos ug kalidad sa cameras, talagsaon tinuod ang kaligdong ug kaisog nga gipakita nilang Alarcio ug Nerez.

* * *

Apan kon gipasagdan pa lang silang Alarcio ug Nerez, nahadlok kong di silang kasalikway sa makaiibog nga mga tentasyon ni makasagang sa makalilisang nga panghudlat sa dagkong mga magpapatigayon ug mga opisyal sa kagamhanan nga gipasanginlang naka-gordo ning maong transaksiyon. Dako og natabang pagpatuyhad sa ilang mga tuhod ang pasidaan ni Visayas Ombudsman Virginia Palanca-Santiago nga mahimong maposasan ug mabilanggo sab silang duha, uban sa mga opisyal sa Department of Public Works and Highways (DPWH) nga gikiha og plunder, kon dawaton ang cameras nga wa kapasar sa labing batakang mga panginahanglan sa kontrata.

Ang nakanindot mao nga bisag unsaon pag aleluya nilang DPWH 7 Director Robert Lala ug Calderon sa kangilngig sa cameras, wa silay mahimo paghingpit sa transaksiyon kon way bendisyon gikan sa end user, ang PRO 7 nga gipangulohan nilang Alarcio ug Nerez.

* * *

Nakapanukad ang kaligdong ug kaisog nilang Ombudsman Santiago, Alarcio ug Nerez tungod sa bantang ug di malalis nga paglikoy sa transaksiyon: Ang 41 ka cameras nga gitaod sa Triton Communications maka-transmit lang og 16 FPS (frames per second), nga kalapasan sa gitakda sa terms of reference (TOR) sa subasta nga 30 FPS. Gipasanginlan sang supplier nga napakyas paghatod sa katimbang nga kahimanan sa komunikasyon. Apan bisan pa ini, silang Lala ug kaubanan gipasanginlan nga nagharab-harab paghatag sa Triton og P63 milyones, 76% sa kinatibuk-ang bayad, nga maoy sukaranan sa ilang giatubang nga kasong plunder.

Nanggawas ang tanang dokumento sa gikuwestiyon nga transaksiyon tungod sa pagbarug ni Crisologo V. Saavedra nga maoy tinuorayng nakadaog sa subasta. Napilde na siya dihang gibasura sa DPWH ang iyang kontrata pabor sa Triton ug maglisod na pagkolekta og bisan usa ka dako sa nabulilyasong proyekto, apan nisaad si Saavedra atol sa iyang pagtambong sa Arangkada sa DYAB Abante Bisaya nga di niya lung-an kining kasoha hangtod nga mahibalik ang nausik nang minilyon ka pesos ngadto sa nagtukaw ug nagkadusingot nga mga magbubuhis.

* * *

Email: [email protected]