Isyu sa politika

Nag-una si Kongresista Antonio V. Cuenco sa mga kandidato sa umaabot nga eleksyon dinhi sa Sugbo nga gipasakaan og kaso.

Dili hinoon kalapasan sa mga lagda sa Omnibus Election Code ang gipasaka nga kaso batok ni Cuenco didto sa Visayas Ombudsman kagahapon, kon dili usa ka kaso sa paglapas sa anti-graft and corrupt practices act.

Gipasanginlan si Cuenco nga mipa-overprice sa gipangpalit nga 20 ka multicab gikan sa RDAK Transport Equipment Inc. sa kantidad nga tag P300,000 ang matag usa, bisan og ang hustong kantidad unta kuno, kapin lang sa P100,000.

Buyno, kay anaa na man sa Ombudsman ang kaso, lauman nato nga ang mga government graft investigators mohimo dayon og pakisusi aron pagtino kon may basihanan ba ang maong reklamo.

Ang nagplano nga moatbang ni Cuenco paglansar pagka kongresista diha sa south district - Jonathan Guardo - maoy mipasiatab nga mopasaka og kaso batok ni Cuenco, apan natingala mi kay lain man ang mihimo niini.

Usa ka Irene Camarista nga taga V. Rama Avenue sa Guadalupe maoy mipasaka og reklamo batok ni Cuenco kagahapon. Gitataw ni Irene nga wala siya bayri aron mopasaka og reklamo ni Cuenco.

Sa usa ka press statement, gihulagway ni Cuenco nga usa ka lang ka gimik ni Guardo ang pagpasaka og kaso batok kaniya aron nga makapalambo kini sa iyang politikanhong ambisyon.

Buyno, motoo ko nga wala pa kabayri nila ni Cuenco ang maong mga multicab sa tag P300,000. Ang sayop nila ni Guardo mao nga gipabuto nila kining maong isyu nga wala pa makompleto ang transaksyon.

Resulta, mahimong makapanagang sila si Cuenco. Kon tinuod man nga nagtinguha sila si Cuenco nga i-overprice ang pagpamalit sa maong mga multicab, nindot unta nga gihuwat nila ni Guardo nga mabayran ang maong mga sakyanan.

Dili hinoon ko mosagop sa pamahayag ni Cuenco nga sa pagka karon mopahigayon pa sila og public bidding sa pagpalit og Chariot Kingcab vehicles.

Unsaon paghimo og "public bidding" sa pagpalit nila niini nga ang maong matang sa mga sakyanan, exclusive man nga gihimo ug gibaligya sa RDAK Transport nga gipanag-iya ni Reagan King?

Sa iyang suwat ngadto ni Kapitan Vicente Ramos sa barangay Quiot kaniadtong Disyembre 23, 2006, gipahibalo sa kongresista ang kapitan nga ang P6 milyones sa iyang Priority Development Assistance Fund gitagana aron ipamalit og Kingcab vehicles. Sabta pag-ayo. Ingon niini ang pagkasuwat. "Please note that I have earmarked said amount for the purchase of Chariot Kingcab vehicles to be used by the barangays in the second district of Cebu City. RDAK Transport Equipment, Inc., the manufacturer and sole distributor of Chariot Kingcab vehicles, will make arrangements with you, subject to COA rules and regulations and my final approval." Dili ba klaro man kaayo nga ang iyang ipapalit mao g'yod ang mga Kingcab vehicles nga gibuhat sa RDAK? Unsaon pagsuplay og susamang mga sakyanan sa ubang supplier nga exclusive man kining gihimo sa RDAK? Nindot kaayo kining maong isyu apan usbon nako, tungod kay gidali-dali man sa pagpabuto ang maong isyu, nagkuwang ang mga gikinahanglang ebidensya.

Ambot, ang abogado ni Camarista usa man unta ka kanhi luyo-luyong fiskal sa dakbayan, wala man kompletoha ang iyang mga dukomento aron lig-on kini nga basihan sa usa ka imbistigasyon.

* * *

Sugod karong Pebrero 5, makita na ako kanunay sa mga buhatan ubos sa pagdumala sa City Hall, ilabi na kadtong wala g'yod kaayo bisitahi sa mga reporters. Pahimudsan nako ang pagpasalamat ni Editor-in-Chief Jerry Tundag, Managing Editor Nimrod Quiñones ug news editor Quennie Bronce nga nakahukom na g'yod sila nga ibalik ko pagdistino sa City Hall.

Modul-an ko sa duha ka tuig nga gidistino sa Palace of Justice gikan kaniadtong Mayo 10, 2005. Hinoon, nakapadugang kini sa akong kinaadman sa pamalaod.

Gikan sa Rules of Courts ug ubang law books nga akong gibasa, hinay-hinay na ako karon nga mipakli sa libro nga Investigating Local Governments aron paglab-as sa nakat-onan nako kaniadto sa Philippine Center for Investigative Journalism.

Awhagon nako kadtong dunay mga inpormasyon kabahin sa mga anomaliya sa City Hall, o kaha bisan unsa nga inpormasyon nga angay'ng mahibaw-an sa publiko, pahibaw-a ko ninyo sa akong cellphone 0917-3836645.