Bangaw ni Senyor

Nanlimbawot ang balhibo sa mga nangapil sa fluvial procession sa ilang pagkakita na sab og bangaw sa ikaduhang sunudsunod nga tuig. Lahi hinuon sa niaging tuig nga duha ka hingpit nga bangaw ang ilang nakita, kabahin lang sa bangaw ang nakita gahapon. Apan sama kagamhanan ang epekto ngadto sa mas daghang mga debuto ni Sr. Sto. Niño nga naminaw lang sa radyo. Giisip nila ang pagpakita na sab sa bangaw nga timaan nga nabatian ang ilang mga pangaliya.

Mas hapsay sang mga kalihokan sa pagbalhin sa mga imahen sa Sto. Niño ug sa Birhen sa Guadalupe karong tuiga kay sa nangaging katuigan: Ang translacion gikan sa Basilica del Sto. Niño ngadto sa St. Joseph Parish sa Mandaue; ang foot procession gikan sa simbahan paingon sa pantalan; ang fluvial procession; ang foot procession nga nibalik sa mga imahen ngadto sa Basilica; ug ang solemn procession nga nilibot sa mga imahen sa dagkong kadalanan sa downtown sa Dakbayan sa Sugbo.

* * *

Ang kahugot ug kamatinud-anon sa pagbalaan sa mga Sugbuanon sa Sto. Niño ug sa Birhen sa Guadalupe napasundayag sa duha ka higayon sa wa pa ang bisperas sa Piyesta Senyor:

• Ang Walk with Jesus duha ka Biyernes nang nilabay gikan sa Fuente Osmeña paingon sa Basilica nga gisalmotan sa kaliboan ka mga debuto bisan sa pagbunok sa uwan; ug

• Ang Walk with Mary niadtong Biyernes gikan gihapon sa Fuente paingon sa Basilica nga gikuyogan sa gibanabanang 20,000 ka mga debuto.

Sa wa pang mga prosesyon gahapon, nagpunsisok na pag-ayong mga debuto nga nanghawok sa imahen sa Sto. Niño. Dayong abli sa ganghaan sa Basilica gahapon sa kadlawon, may tulo na ka pila sa mga debuto nga ang mga nag-una, nga naglakip sa mga taga Bohol, Tacloban ug Dumaguete, nag-atang nang daan sa niagi pang tungang gabii. Ang labing taas nga pila nilangyab gikan sa eskina Magallanes paingon sa City Savings Bank. Ang usa ka debuto kinahanglang magpaabot og dul-an sa tulo ka oras sa di pa makahawok sa imahen.

* * *

Ang "Tabang Dos" nga gisalmotan sa 30 ka labing inilang mga banda sa Sugbo ug kasilinganang mga dapit malampusong nitapok sa mga batan-on ug ubang mga mahiligon sa musika aron pagpahibawo nila nga taliwa sa kasadya sa Piyesta Senyor dunay mga biktima sa bangis nga mga katalagman sa niaging tuig nga padayong nagkinahanglan sa ilang dinaliang panabang.

Si Angela Calina sa Powerhaus Inc., kansang determinadong paningkamot maoy nakahatag og higayon sa mga banda pagtokar nga libre, malampusong nakabugkos makausa pa sa KBP Cebu Chapter, ABS-CBN Cebu, DYAB Abante Bisaya, JCI ug Cebu City government pagtino nga matigom ang labing daghang hinabang sa mga Sugbuanon alang sa mga biktima sa Reming sa Bicol, Seniang sa Kabisay-an ug sa sunog sa Bo. Luz.

* * *

Email:[email protected]