ASEAN langayan

Bisan sa panultihon nga mas maayo pang nalangay kay sa wa gyod, ang mga pangu sa Asean di katampok sa ilang dughan aron pagpagarbo ngadto sa katawhan sa nakab-ot nga kauyonan pagpalambo sa ilang pagtinabangay sa kampanya batok sa terorismo. Sa di pa ka mopakpak sa katalagsaon sa kauyonan nga nakab-ot, basaha ni ug hilak:

• Ang kauyonan gisugdan pag-umol human sa pangatake sa Al Qaeda sa Estados Unidos niadtong Septiyembre 11, 2001;

• Ang wa nila pag-apura nakahimo sa Asean, kansang mga nasud maoy naigo sa pipila sa labing bangis nga pangatake sa mga terorista, nga usa sa labing iwit nga nakaumol og makahuloganong tubag sa kalibotanong suliran sa terorismo; ug

• Bisan napirmahan nang kauyonan sa dinhi sa Sugbo niadtong Sabado, kinahanglan pang magtagbo na sab ang ilang mga representante sa Bangkok, Thailand sunod buwan aron sabotan unsaon pagpatuman ang kauyonan, nga di maayong tilimad-on kay ang Asean maoy naghupot sa labing taas nga listahan sa mga kauyonan nga gipasagdan lang nga wa mapatuman.

* * *

Sa di pa sab ta magsayaw-sayaw sa kadalanan ug mag-piyesta sa pagsaulog sa laing giwarawara nga laing naumol nga kauyonan sa charter sa Asean nga gipanghinaot nga mao nay makapalig-on sa kahugpongan ug makahimo ining takos nga makatubag sa nag-usab-usab nga mga panginahanglan sa paspas nga mga panghitabo sa ubang bahin sa kalibotan, angay natong hinumdoman nga ang nauyonan sa Asean heads of state mao lang ang pagtuon kon angay bang umulon ug di pa ang pagsagop na sa charter. Ug kon basehan ang ilang kapaspas pag-umol sa kauyonan batok sa terorismo, morang siyam-siyaman pa tag pinaabot kanus-a mahuman ning ilang pagtuon.

Gawas pa, kon maumol man gyod ang Asean charter, nga mohatag nag gahom sa kahugpongan pagsilot sa mga sakop nga di motuman sa ilang mga kauyonan, nipasidaang daan ang Sugbuanong kanhi presidente sa University of the Philippines, Francisco "Dodong" Nemenzo, nga pikatan lang ang Asean kay di man silay nagkontrolar sa mga ekonomiya sa Myanmar ug ubang giinitan nga mga nasud.

* * *

Ang pagkahilo sa pagkaon sa kapin sa 50 ka performers alang sa gala dinner sa mga delegado sa summit gabii dakong sagpa sa mga tigpasiugda sa kalihokan, nga ang pangandam gipangunayan gyod pagduma ni Pres. Arroyo. 35 sa mga pasyente ang nasud sa Perpetual Succor Hospital samtang 22 ang nasud sa Cebu Doctors Hospital.

Tinuod ba nga ang pagkaon nga gihukad alang sa mga biktima nahikay sa niagi pang tuig ug igo lang gihiposan human nauswag ang summit sa niaging buwan? Samtang way mga delegado nga naangin, di mabasol ang heads of state nga mas magmabinantayon na sa pagkaon sa multi-milyones pesos nga five star nga mga putahe nga giandam alang nila.

* * *

Email: [email protected]