Barato ra ba god?

Dakung hagit ang giatubang karon sa mga kawani sa Commission on Audit kabahin sa pagduda nga gipaburot pag-ayo sa pipila ka mapahimuslanong mga opisyal sa kagamhanan ang kantidad sa mga decorative lamp post diha sa lainlaing rota nga maoy agianan sa mga delegado sa Asean Summit.

Bisan ako, dili g'yod makatoo nga ang matag usa sa maong mga decorative lamp post nagkantidad og P95,000 sigun sa mga report nga akong nadunggan.

Aw buyno, aron pagmatuod nga ang kantidad sa pagpalit sa kagamhanan sa maong mga decorative lamp post dili mahal, kinahanglan nga iprobar sa mga hingtungdang opisyal nga barato kini kon itandi sa uban.

Apan kamong mga makakita sa maong mga decorative lamp post, sigurado ko nga dili g'yod kamo makatoo nga ang kantidad niini tag P95,000. Makita nimo kining maong mga decorative lamp posts nga dug-ol kaayo ang pagkabutang gikan sa Marco Polo Hotel agi sa North Reclamation Area ug ngadto na sa airport.

Mas labing maayo unta kon dunay ubang supplier niining maong mga decorative lamp post nga mopatim-aw og motabang sa pagbutyag nga kini gipalit sa mahal kaayong kantidad.

Ang mga opisyal sa kagamhanan kinahanglang mohatag g'yod og tukmang katin-awan niini aron nga kon tinuod man nga tukma ra ang kantidad sa butang nga ilang gipalit, dili magduda kanila ang katawhan. Tiaw mo, usa nako ka higala miingon nga kining maong pagpa-overprice pagpamalit og decorative lamp post gituyo kuno aron nga ang administrasyon makatigum og "campaign funds" para sa eleksyon. Kon ako'y usa ka state auditor, maikag g'yod ko nga mosusi kon tukma ba ang kantidad sa maong mga gipangpalit nga butang. Hinoon, dili nimo malikayan nga dunay mga tawo nga mahadlok g'yod nga mawagtangan og trabaho.

* * *

Daghan ang nangalipay nga gimando ni Presidente Arroyo ang subli nga pagpanawat og mga dili lisensyadong armas aron mapalisensyahan kini sa tumang kasayon pinaagi sa Amnesty Program sa kagamhanan. Usa kini ka nindot nga paagi kay gawas nga makakwarta ang kagamhanan gikan sa mga Firearms Fees, mahimo pa gayod nga responsable kadtong mga tawo nga makapalisensya og armas.

Kadtong mga tawo nga naghupot og lisensyadong armas, mga responsable nga mogamit sa ilang pusil, dili sama sa mga naghupot og mga walay lisensya nga "marka-bahala" lang.

Sigurado ko nga daghan sa mga tighimo og armas diha sa Danao mangalipay g'yod kon dunay Gun Amnesty kay pwerteng daghana nga magpahimo kanila og armas. Usa nako ka suod nga tighimo'g armas sa Danao mitug-an nako nga karon pa lang gani, daghan na ang mi-order nga magpabuhat og 45 kalibre nga pistola. Nindot ang pistola kon ang tag-iya dili lang tapolan molimpyo sa ilang armas, ingon man mga nindot nga bala ug magazine ang ilang gamiton. Kon bati nga bala ug magazine ang inyong gamiton, malagmit nga kamo pay mapatyan sa inyong kontra kay sigurado man nga mo-jam ang inyong armas.

* * *

May mi-report kanako nga tigpalitan og usa ka matang sa Liquified Petroleum Gas (LPG) nga kuwang kuno sa timbang.

Dili hinoon ko dayon motoo nga tinuod ang gireklamo batok sa Pryce Gas apan kadtong mga hingtungdan, may katungod sa pagpadangat og reklamo ngadto sa Department of Energy.

Apan kon tinuod man gani ang reklamo, hayan nga ang distributor sa maong mga LPG maoy nagbinuang. Sayonan ka, tag usa ka kilo ang kuwang sa matag tangke sigun sa reklamo.

Ang lagda mao nga ang mga tigbaligya niining maong matang sa produkto duna g'yoy timbangan aron nga kadtong mga pumapalit nga magduda sa gibug-aton, makahimo sa pagsukod sa timbang sa LPG.

* * *

Dunay misugyot nga ipatangtang ang mga dagkong placards diha sa mga infrastructure projects nga nagpahibalo nga ang maong proyekto iya sa usa ka kongresista.

Buyno, maayo usab kining maong sugyot. Unsaon, kini na man maoy naandan sa atong mga politiko.

* * *

Ayaw kalimot, kadtong mga dunay i-report kanako nga reklamo, ipadala sa 0917-3836645. Ayaw lang kahibulong kon dili ko motubag ninyo kay kon ako kining buhaton, mahutdan ko sa load.

Gawas sa Birador nga mogawas sa The FREEMAN matag Martes, duna ko'y mga lindog sa Banat News. Ang Renbor Patrol mogawas matag Miyerkoles, Sabado ug Dominggo.