Suga ug kamera

Dakong eskandalo ang pagkapawong, pagpanghirig, pagpangatumba, o pagkawagtang na sa kapin sa gatos ka decorative lamp posts pila lang ka adlaw human nataod ug usa ka semana sa di pang Asean Summit dinhi sa Sugbo sunod semana. Inay makapanindot, ang mga poste nakapakabang na hinuon sa ruta sa summit gikan sa Marco Polo paingon sa Shangrila kay nagpat-ak-pat-ak man ang mga poste nga nangapawong, nangahirig, nangatumba, o nangawagtang.

Mas dakong eskandalo ang nabisto nga makapalurat sa mata nga kadako sa presyo nga gitakda sa Department of Public Works and Highways (DPWH) alang sa matag poste: P95,000! Alang sa mga suga nga wan a kinahanglana pag-iwag sa agianan sa mga delegado, kay gawas nga naputos nang tibuok ruta sa suwaw kaayong mga suga sa center island sa ruta, labihan pa gyod kaawop ang sihag sa mga suga nga nahimutang sud sa mga poste, ang nasudnong kagamhanan nigahin og P100 milyones gikan sa daginutong panudlanan nga hinukad sa singot ug dugo sa kabos nga mga magbubuhis.

* * *

Tungod tingali sa kaapiki sa panahon, ang kadagkoan sa DPWH 7 nipatuyang na lang sa klarong pinataka nga pagpanaod sa mga poste ug mga suga. Kon wa pa mabisto sa ABS-CBN News, mahimong mabantang gyod unta sa heads of state sa Asean ang ebidensiya sa ilang pagpabaya. Mirisi sab sa mga kontraktor kay klaro mang dinalidali ang ilang trabaho:

• Giugbok ang mga poste sa tungatunga sa sidewalk nga bag-o lang gihawanan gikan sa sidewalk vendors ug mga barungbarung nga di gusto sa mga tigpasiugda nga malilian sa langyawng mga delegado;

• Mabaw ra kaayong lungag nga gipabarugan sa mga poste maong dali rang napukling dihang nibunok ang kusog nga uwan ug nihuros ang kusog nga hangin sa niaging semana ug sayon rang giibot sa mga kiriwan nga gidasig sa kakonsabong junk shops; ug

• Ang pipila sa mga poste nagtungtong pa gyod sa mga kanal nga kuyawng makutayan og kuryente ug makaangin na hinuon sa mga kinabuhi ug mga kabtangan.

* * *

Apan samtang labihang isoga sa DPWH 7 nga nipasidaan sa mga kontraktor nga di sila bayran kon di mapasiga ang tanang suga karong semanaha, nganong gibayran na man nilang labaw pang kuwestiyonable nga surveillance cameras nga wa pa man diay dawata sa kapolisan nga maoy end-user sa kahimanan? Ambot tinuod bang wa pa mabayri ang mga kontraktor sa decorative lamp posts, apan nakadawat nang Triton Communications sa P62 milyones nga pasiunang bayad sa gikuwestiyon nga transaksiyon.

Ang wa pagkatagbaw ni PSSupt. Lani-O R. Nerez, ang ikaduhang labing taas nga opisyal sa PRO 7, kay di real-time ang hulagway nga nakuha sa mga kamera, gawas nga wa mapahimutang sa tukmang mga dapit, maoy kamatuoran nga nagbuut-buot rang DPWH 7 pagpalusot sa kuwarta alang sa transaksiyon nga wa pa matuman.

* * *

Email:leo_lastimosa@abs-cbn.com