UFOs sa Sugbo

Ang misteryusong buto nga nakapaukay sa mga molupyo sa amihanang Sugbo nga gidasonan sa unidentified flying objects (UFO) nga nakit-an sa mga molupyo sa Minglanilla nakapapugwat sa mga Sugbuanon sa dugay nang gihugunhugon nga dunay laing mga kinabuhi gawas sa atong planeta. Nisaad ang Pag-asa Planetarium nga mapahibawo nang sangpotanan sa ilang imbestigasyon sa duha ka insidente sud lang sa duha ka semana. Apan may sukaranan ang mga pangagpas nga, sama sa nahaunang UFOs nga nakit-an sa ubang bahin sa Pilipinas, Estados Unidos ug ubang kanasuran, magpabiling di mailhan ug padayong mahimong sumsoman sa mga tabitabi ang mga butang nga naglupadlupad.

May mga kinabuhi ba gyod sa ubang mga planeta sa kawanangan? Sila bay nanimon sa kahibulongang mga sakyanan nga nagpakita matag karon ug unya? Igo ba lang silang naniid o may lain silang tuyo? Mahigalaon ba sila o pulbora say ilang mga utok? Salamat sa kakaraan sa atong kahimanan, di tang kalaom nga makauna ta og tubag ning mga pangutana nga kaniadto rang nakapakutaw sa mas malambuong kanasuran.

* * *

Matubag na hinuon sunod semana madugangan bang nailhan nang mga planeta sa atong solar system. Sa labing uwahing ihap sa astronomers nga nagtapok sa Prague, ang ulohan sa Chekoslovakia, usa ka dosena nang mga planeta ug mas daghan pang mapuno. Apan kinahanglan unang uyonan sa 2,500 ka nanambong sa 26th general assembly sa International Astronomical Union ang gisugyot nga bag-ong definition sa planeta: Kinahanglang molibot sa bituon apan di bituon; kinahanglang may gidak-on kansang gravity igo nga makapalingin niya.

Kon aprobahan, ang mga planetang Mercury, Venus, Earth, Mars, Jupiter, Saturn, Uranus, Neptune ug Pluto madugangan na sa Ceres (kanhi asteriod tali sa Mars ug Jupiter), Charon (sunod sa Pluto) ug ang kinalayoan nga 2003 UB313 (hatagan unya og tinuod nga ngan) nga mas dako pa kay sa Pluto. Duna pay laing tulo nga susama og bayhon sa Pluto, nga nakit-an sa bag-ong mas gamhanang mga teleskopyo, nga mahimong ideklarar sab nga bag-ong mga planeta.

* * *

Si Urbain Le Verrier, mathematician sa Pransiya, kinsa nakatumbok sa nahimutangan sa Neptune sa wa pa ni nakit-i, nangagpas nga laing planeta, ang Vulcan, maoy nahimutang taliwa sa adlaw ug sa Mercury, ug nga maoy hinungdan sa tulipsay nga lihok sa Mercury. Si Albert Einstein nakahimo hinuon og laing katin-awan-pinaagi sa iyang general theory of relativity-nga wa maglakip sa Vulcan.

Ang kalibotanong kahugpongan sa astronomers nga natukod niadtong 1919 maoy mohusay sa tanang lalis sa kawanangan. Ang ilang tigom sa Prague molungtad hangtod sa Biyernes sunod semana. Gikasubo nako pagpahibawo nimo nga di maapil sa ilang mga gihisgutan ang bola sa kayo sa amihanang Sugbo ug ang gibanabanang 15 ka UFOs sa Minglanilla.

* * *

Email:[email protected]