Damgong newsroom

Palihug ayaw ipanabi sa akong kadagkoan sa ABS-CBN Broadcasting Corporation, ug labi na sa among mga karibal, bahala na kon lisod na silang makaapas kay dako na man kaayo mig labaw, ang akong gidamgo nga newsroom, salamat sa labing bag-ong mga teknolohiya sa komunikasyon, inay mahimutang sa sibyaanan adto na manukad sa mga pinuy-anan sa mga tigbalita:

• Ang deskman (nga taguon lang nato sa ngan nga June Perez) inay mangadlawon pagbiyahe sa iyang sibyaanan (nga taguon lang nato sa call letters nga DYAB) sa Jagobiao adto na lang mag-andam og balita sa ilang bay sa Tisa ginamit ang Wiki, Google Spreadsheets o Instant Messaging;

• Ang reporter (nga taguon lang nato sa ngan nga Edgar Escalante) inay mangadlawon og panuktok sa mga presinto sa kapolisan, magpuyo ra sa ilang bay sa Busay, moukab sa blotter online, mosuhid sa kadalanan pinaagi sa webcams ug mosibya sa iyang nahipos nga kasayuran pinaagi sa VoIP; ug

• Ang newscaster (nga taguon lang nato sa ngan nga Edgar Gutierrez) inay mag-antos paglatas sa gubot kaayong trapiko gikan sa Basak paingon sa Mandaue, mo-access sa gisuwat nilang June ug Edgar, mo-click sa VoIP sa DYAB, moigham sa PC mic pagtino sa voice level, moabli sa Cool Edit nga maoy motokar sa intro, beds ug stingers, ug magsugod nang tulomanon (nga hatagan lang nato sa ulohan nga DYAB Radyo Patrol Balita).

* * *

Di pa ko andam nga mohimo og pormal nga rekomendasyon, apan duna na koy pasiunang lista sa mga kaayuhan nga makuha sa mga tigbalita ug sa mga sibyaanan kon mapatuman ang akong nahunahunaan:

• Motidlom ang gasto sa tigbalita (plitehan ug pagkaon) ug sibyaanan (meal allowance, aircon ug suga sa studio); ug

• Mas taas nang panahon nga makauban sa tigbalita ang iyang pamilya nga hinaot mopalambo sa iyang productivity ug mas gamay na lang ang mga kawani nga bantayan sa tagduma sa sibyaanan nga modugang sa panahon pagtan-aw sa mas dakong hulagway ug pagplano alang sa umaabot.

Di kay kana ra. Kon himuon ni sa uban pang mga industriya, kadako kaha sa tidlom di lang sa konsumo sa gasolina ug kuryente kon dili hasta na sa mga krimen batok sa biniyaan nga mga panimay, kahapsay na kaha sa trapiko ug kamalipayon na kaha sa kanunay-nang-magkita nga mga sakop sa pamilya.

* * *

Bisan ang mga tinubdan sa balita makapahimus sab. Di na sila motakilid pagpakaon sa mapahimuslanong tigbalita ni makugang sa daghang mikropono ug kidlap sa kamera kay mahimo na mang manubag og mga pangutana sa email o IM o sa webcam kon gusto silang madunggan ug makit-an sa publiko.

Ang nahibilin natong himuon mao na lang ang pag-ila sa patron sa internet. Aron ampoan nga mahimo bang menosan ang pagkaging sa PCs ug pag-crash sa websites.

* * *

Email: [email protected]