Emosyon sa kawsa

Nagkapersonalay ang mga lider sa militante ug anti-komunistang mga pundok atol sa sinemanang Kapamilya Media Forum sa DYAB Abante Bisaya ug Sky Cable. Si Pastor Alcover Jr. sa National Alliance for Democracy (NAD), kansang makapaukyab nga sinultihan nakahimo niyang usa sa labing mabulukon nga pangu sa kampanya batok sa mga rebeldeng komunista, nilampos sa pagtuhil sa emosyon sa mga haligi sa Bagong Alyansang Makabayan ug ubang militanteng kahugpongan.

Kahilakon si Wennie Badayos, pangu sa Alyansa sa mga Mamumuo sa Sugbo (AMA-Sugbo-KMU), nga nanalipod sa pag-alsa og armas batok sa kagamhanan sa iyang pag-umangkon nga si Jerry Badayos, ang batan-ong manggugubat sa New People's Army (NPA) nga napatay sa engkuwentro sa kasundalohan sa amihanang Sugbo. Matud ni Badayos di angay'ng basulon si Jerry nga igo lang nangita og hustisya alang sa iyang amahang si Jimmy, manghod ni Wennie, kinsa wa na igkita ug gikahadlokang patay na human kuhaa sa mga sakop ni karon Senador Panfilo Lacson dihang siya pay hepe sa Cebu Metrodiscom pila na ka dekada ang nilabay.

* * *

Bisan si Paul Rodriguez sa Bayan, nga naila sa kalumo sa iyang sinultihan, wa kapugong pag-isa sa iyang tingog nga ang pagkuyog ni Alcover sa NPA sa iyang kabatan-on dihang aktibo pa sa serbisyo ang iyang amahan, si M/Sgt. Pastor Alcover Sr., nagpasabot nga nakaako siya pakig-unay sa iyang kaugalingong amahan o nga sukad pa sa sinugdanan deep penetration agent siya sa militar nga nagmalampuson pag-ilad sa liderato sa NPA.

Sa una nilang engkuwentro sa SM City Entertainment Plaza, nga maoy pahigayonan sa media forum matag Biyernes sa buntag, nakasaksi ko sa masuk-anong pagsukmat sa asawa ni Rodriguez kang Alcover nga iyang natukmaan nga nagdiskurso sa ilang lungsod sa Leyte pila ka tuig nang nilabay nga namasangil sa iyang bana nga usa ka luog nga kriminal. Si Alcover nga mas kalmang manulti kon way mikropono ni-am-am ni Mrs. Rodriguez pagpanganaog na namo gikan sa entablado.

* * *

Gilihayan ni Alcover ang pagtuki ni Rodriguez sa iyang relasyon sa iyang amahang sundawo, apan wa siyang kahupo sa emosyonal nga paghagit ni Jaime Paglinawan, regional chairman sa Bayan Central Visayas, sa kapolisan nga posasan si Alcover tungod sa iyang pag-angkon og responsibilidad sa pagpamomba sa usa sa mga kolehiyo sa Sugbo nga nisangpot sa kamatayon sa usa sa mga tinun-an. Matud ni Paglinawan ang rebelyon usa ka "continuing crime" busa mahimo pang taralon si Alcover sa hukmanan tungod sa pagkumpisal sa iyang papel sa pagpamomba atol sa ilang debate ni Rodriguez sa samang media forum pila ka buwan nang nilabay.

Apan si Alcover niingon nga ang tinun-an namatay kay gipusil sa guwardiya sa eskuylahan di tungod sa pagpamomba, gawas nga gipasaylo na siya sa kagamhanan sa tanan niyang atraso human sa duha ka tuig niyang pagkabilanggo.

* * *

Email: [email protected]