Kasong giyak-an

Kumusta na man ang imbestigasyon sa Visayas Ombudsman sa nabistong pag-usab sa charter sa Mactan-Cebu International Airport Authority (MCIAA) nga gitumong pag-ilad sa Civil Service Commission (CSC) aron magpabilin si General Manager Adelberto Yap sa katungdanan? Ang gi-doktoran nga dokumento nga nadawat sa CSC di lang kay pinirmahan ni Yap nasubay pa gyod nga gi-fax gikan sa iyang buhatan.

Kining maong eskandalo maoy usa sa mga sukaranan nga gipa-imbestigar sa MCIAA board si Yap. Padayon pa hinuong gisusi angay ba siyang ipaubos og preventive suspension samtang nagpadayon ang imbestigasyon. Apan dugay rang nasang-at ang kaso ngadto sa Ombudsman. Nganong mora man og wa magdali ang ilang mga imbestigador?

Hinaot nga karong nahibalik na sa headlines ang kontrobersiya, salamat sa pagpanginlabot ni Gobernador Gwen Garcia, mapugwat pagbalik ang Ombudsman pag-ugkat ning usa lang sa gatosan ka giyak-an nilang kaso.

* * *

Nakugang na kong pagkahibawo nga si retired police officer Roy Codeniera ang diha sa pikas linya sa telepono dayong sugod sa TV Patrol Central Visayas niadtong Biyernes. Mas nakugang ko sa iyang tuyo: Mangayo siya og type "O" nga dugo kay duna siyay prostate cancer ug gitagalan na sa doktor ang iyang kinabuhi. Matod ni Codinera naa siya ron sa Mandaue City District Hospital. Nipasangil siya nga gibiyaan na siya sa iyang asawa ug nga wa nay nag-atiman niya.

Daghang motandi ni Codeniera ngadto ni SPO1 Adonis Dumpit tungod sa kadaghan sa kontrobersiyal nga mga kaso nga iyang nasulbad. Ang usa sa labing dako mao ang iyang pagdakop sa pipila sa mga sinumbong sa kasong pagdagit sa managsuong Jackie ug Marijoy Chiong. Ang iyang pagkumpisal nga inosente ang ilang mga dinakpan wan a hatagi og bili kay gawas nga gidudahan nang kahimtang sa iyang panghunahuna human nasakit, nahukman na sa Korte Suprema ang kaso.

Bisan unsa pa, ang kalayo sa gihagbongan ni Codeniera pahinumdom niadtong mga naglaom nga mahakgom ang ilang gahom ug katigayonan hangtod sa kahangturan.

* * *

Naghisgot man lang gyod ta og dugo, pahimuslan nako ang pagpahibawo nga ang laing hugna sa DYAB Kapamilya Bloodletting himuon karong Sabado sa labing dagkong shopping malls dinhi sa Sugbo. Sa kataposan natong bloodletting niadtong Abril 22, dul-an sa 500 ka bags sa dugo ang atong nahipos uban sa panabang sa Philippine National Red Cross (PNRC), Regional Blood Coordinating Council (RBCC) ug Cebu City Medical Center (CCMC).

Hinaot nga markahan nang daan ang inyong mga kalendaryo sa dako natong kalihokan karong Sabado. Paminaw lang palihug sa DYAB Abante Bisaya sa dugang mga detalye ning umaabot nga laing pangalagad sa atong mga kapamilya sa Sugbo. Hinumdomi, ang dugo maoy gasa sa kinabuhi ug ang pag-ula sa dugo pagluwas sa imong isigkatawo usa ka bayanihong buhat.

* * *

Email: [email protected]