Gwen ug Yap

Baga gyod diay og tagiptip si Heneral Adelberto Yap. Kay bisan gipa-imbestigar na siya sa mga sakop sa board sa Mactan-Cebu International Airport Authority (MCIAA), nga maoy nagdupadupa niya sa nahauna niyang mga bulilyaso-ka-way civil service eligibility ug ang giingong pagpayuhot og dinoktorang kopya sa charter sa MCIAA aron pag-ilad sa Civil Service Commission (CSC)-nagpapating lang gihapon siya pagpabilin sa katungdanan.

Di kay kana ra. Nanganti pa gyod nga kon duna may mga anomaliya ang mga proyekto nga iyang gipatuman maduhig ang tanang sakop sa board, apil na si Gobernador Gwen Garcia nga maoy nagsige karon og tulisok niya, kay igo lang siyang nagtuman sa ilang mga sugo ug ang board maoy nag-aprobar sa subasta ug pagpatuman sa mga proyekto. Pasumbingay ba ning Yap nga may bay sa lampinig nga mabungkag kon apikihon gyod siya?

* * *

Maglisod kog tuo sa laksot nga away nilang Yap ug Garcia. Kaniadto, naglisod ang publiko pagpakisayod unsay nahitabo sa mga tigom sa MCIAA board-labi na sa sibawng mga pasangil sa anomaliya sa mga proyekto ug sa pagpalayas sa CSC ni Yap-kay ang board, labi na silang Yap ug Garcia, labihang tak-oma. Karon, magkapuliki nang media pagsunod sa nagbaha nga kasayuran sa mga kontrobersiya sa tugpahanan.

Didto ko sa Kapitolyo sa Maasin pila na ka buwan ang nilabay dihang nitugpa ang helikopter ni Garcia aron pagtunol sa P5 milyones nga hinabang sa Sugbo alang sa mga biktima sa katalagman sa Southern Leyte. Kuyog niya si Yap nga klarong nagdalidali pagputos og gamayng putos aron lang may ikatunol sab ni Gobernador Rosette Lerias. Kon unsa kasiga sa mata ni Yap nga nagtan-aw nako mao sab katam-is ang iyang tinan-awan, nga gikuyawan god kong moluhod siya ug mangaliya, ngadtong Garcia.

* * *

Karon, morag usa ka dangaw na lay kuwang ug tawgon nang Garcia nga kawatan si Yap. Unsay nahitabo nila?

Kon tinuod nga nahasol ang gobernadora sa pasangil sa CSC nga gi-doktoran ang kopya sa MCIAA charter nga gigamit ni Yap pagpabilin sa katungdanan ug nga overpriced ang mga proyekto ni Yap, dugay na mang nabisto ang mga eskandalo, nganong karon pa man mangisog ang gobernadora?

Naghimo ba si Garcia sa iyang kaugalingong imbestigasyon ug karon pa makatimaho nga nangalisbo si Yap? O may laing pabilo ang iyang kasilag?

* * *

Apan kon tinuod sang mga huhungihong nga gikastigo niya si Yap kay gipalusot ang ARN Builders nga di maoy iyang paboritong kontraktor, nganong wa man barawa ni Garcia ang sangpotanan sa subasta niadto pa?

Kon ang MCIAA board nagduda sa katakos sa ARN, nganong gitugotan man ni nilang makasugod sa trabaho? Salamat sa bugno nilang Yap ug Garcia, may kahigayonan nang mga Sugbuanon pagsusi unsa kaligdong ang mga tagduma sa atong tugpahanan.

* * *

Email: [email protected]