Tam-is nga daog

Human niya palayasa si Phil Jackson ug sa wa pa pangulitawhi si Rudy Tomjanovic sa ting-init sa 2004, ang tag-iya sa Los Angeles Lakers nga si Jerry Buss nitanyag ni Pat Riley nga maoy mohulip sa nabakanteng katungdanan pagka head coach. Apan dihang nangayo si Riley sa mga telepono nilang Shaquille O'Neal ug Kobe Bryant aron motabang siya pagkumbinser nga magpabilin sila sa Lakers bisan sa makauuwaw nilang pagkaparot sa Detroit Pistons, wa na maghisgot si Buss sa iyang tanyag ug ang ilang istorya sa panihapon nahimo na lang lunlon nga pangumustahay sa ilang masigka pamilya.

Wa mahibaw-i sa kadaghanan kining maong sugilanon hangtod nga nanabi si Riley sa iyang mga higala sa media. Matud ni Riley klaro kaayo nga sa wa pa sila magkasulti, nakahukom na si Buss pagbuwag sa iyang duha ka nagkasungi nga superstars ug nga si Kobe ang iyang gipili nga bag-ong pangu sa iyang prangkisa.

* * *

Dihang gipalayas na siya sa Lakers, duha ra ka destinasyon ang gipapilian ni Shaq: Ang Dallas Mavericks ug ang Miami Heat. Tungod sa kahadlok nga kulatahon silang Shaq og kaupat sa regular season ug nga mas molig-on pang ilang kaatbang sa Western Conference, ang Lakers nilabay ni Shaq ngadto sa Eastern Conference. Dihang gitawgan siyang Riley, nga maoy labing unang nakapahibawo nga di na siya Laker, wa moginhawa si Shaq hangtod napasaligan nga wa maapil si Dwyane Wade sa mga magduduwa nga gibaylo niya.

Sa iyang pag-abot sa Miami, nisaad si Shaq og kampeyonato dayong bunyag ni Wade nga "Flash" isip bag-ong pangabaga. Napakyas si Shaq pagtuman sa saad sa iyang unang tuig sa Miami. Dihang natuman nang saad ning ikaduhang tuig, ang iyang pangabaga mao nay iyang bag-ong pangu. Pagmatuod nga di iyang garbo maoy mahinungdanon, o aron lang pagdugang sa katam-is sa iyang kampeyonato nga wa na si Kobe ug si Jackson, gideklarar ni Shaq si Wade nga maoy labing maayong magduduwa ug si Riley ang labing maayong coach sa NBA karon.

* * *

Apan ang labing tam-is nga kadaogan iya ni Riley. Human sa unom ka korona uban sa Lakers (isip coach, asst. coach ug magduduwa), si Riley nahimuntog na sab sa kinapungkayan sa kalibotan sa basketball, 18 ka tuig human sa iyang kataposang kampeyonato sa "Showtime" Lakers, salamat nilang Wade ug Shaq ug sa supporting cast nga nakadapit og bugalbugal dihang iyang gibaylo sa orihinal nga starters.

Ug si Wade? Tinuod nga sayo pang itandi siyang Michael Jordan. Apan sa una niyang NBA finals sa pangedarong 25, nalabwan niyang salida ni Jordan ug sa ubang higante sa liga sa una sab nilang paglutos sa kampeyonato. Puno sa kahinam natong paabuton ang iyang lahutay.

* * *

Email:[email protected]