Ikatulong halad

Sa makausa pa, ang DYAB Abante Bisaya, pagtimaan sa iyang ika-11 nga sumad, mopahigayon sa "Halad sa Kapamilya" karong Sabado sa Plaza Independencia sa Dakbayan sa Sugbo. Human sa talagsaong kalamposan sa unang duha ka "Halad" sa Nobyembre sa niaging tuig ug sa Abril karong tuiga, nahimo na kining institusyon sa serbisyo-lapad, way kinutoban, tinuod gyod nga piyesta sa pangalagad.

Ang labing makapakugang sa kalamposan sa "Halad" mao ang gidaghanon sa mga tawo-gikan sa Sugbo ug kasilinganang mga lalawigan-nga iyang natapok. Ang among labing yano-ug taphaw-nga hubad mao nga ang "Halad" nahimong taytayan tali sa mga tawo ug mga kahugpongan nga naa sa posisyon sa pagtabang ug sa labing kabos ug tabangunon nga mga sakop sa katilingban.

* * *

Ang gatosan ka boluntaryong mga doktor ug mga dentista nakahimo sa libreng konsultasyon ug mga tambal sa "Halad," nga maoy gipunsisokan sa kinabag-an sa mga mangapil, nga maoy labing dako sa iyang matang. Di sayon ang pagtigom og igong tambal, pagdapit og igong mga doctor, ni pagpatuman og hapsay nga sistema aron maalagaran sa labing daling panahon ang tanang namasin nga maalagaran ug matambalan.

Di sayon ang pagtigom og igong mga tolda, mga lamesa, mga lingkoranan, sound system ug megaphones (kay kon sakop ka sa labing dakong media network sa Pilipinas, lisod kaayong pagpangumbinser nga wa kay igong kuwarta) pagpahimutang sa lawod sa katawhan nga nag-abot sa Plaza.

Matag human sa nangaging duha ka "Halad," nakaginhawa mig lawom ug nagpasalamat nga nakalingkawas sa kaalaotan. Apan way bisan usa sa mga tigpasiugda ang nangahas pagsugyot nga di na mi mousab.

* * *

Asa man tuod kag kalihokan nga naa nang tanang matang sa pangalagad nga imong mahunahunaan? Gawas sa one-stop-shops sa labing mahinungdanong mga ahensiya sa kagamhanan-NSO, DFA, SSS, GSIS, Pag-ibig, NBI, LTO, Dole, POEA, OWWA ug daghan pang uban-naay libreng pangalagad sa mga abogado, naay moatiman sa mga iro ug iring-di lang mamakuna, mamurga ug manghatag pa gyod og bitamina ug shampoo sa mga hayop-ug naa pa gyoy libreng pagtudlo sa nagkalainlaing panginabuhi, sa way paghisgot sa libreng lugaw ug ubang pagkaon sa mga bata ug masahe ug reflexology sa mga dagko.

Ang unang "Halad" niadtong Nobyembre labihang uwana. Ang ikaduhang "Halad" labihang inita. Karong Sabado, sa ikatulo ug gilaoman-nga nanukad sa kinasingkasing pangindahay ug tim-os nga pangaliya-nga mao nay kinadak-ang "Halad," nanghinaot mi nga ang adlaw pahinumdoman nga ting-uwan na, nga ang uwan makalimot nga panahon na niya, ug nga ang kinabag-an sa mga mangapil-ang way pagkapuol nga gatosan ka mga nanabang ug ang kaliboan nga natabangan-motuaw uban sa tingog nga puno sa katagbaw nga ang kahimtang sa panahon "labihang nindota!"

* * *

Email:[email protected]