Nataran ni Tomas

Nalukop nag pangitag away si Cebu Mayor Tomas Osmeña apan napakyas pagpanilhig sa iyang kaugalingong nataran. Ang labing makauuwaw nga ebidensiya ini mao ang iyang kainutil sa pagbadlong sa daghang mga palusot sa mga transaksiyon sa nagkalainlain niyang departamento. Ang mayor mismo niangkon nga may sindikato nga naglihok sa City Hall apan wa pa siya kapakita og klarong labok batok sa higanteng mga anomaliya.

Ang labing uwahing palusot nga nakapabulingit sa City Hall mao ang nabistong mga palusot sa Department of Manpower Development and Placement (DMDP). Gipasanginlan ang DMDP sa daghang panguwarta apan wa magkihol ang mayor pagpasusi sa mga binuang.

* * *

Ang DMDP nga gitahasan sa paghatag og libreng pagbansay-bansay sa kabos nga mga molupyo aron makakat-on og bag-ong mga katakos sa panginabuhi gipasanginlan sa mosunod:

• Nangolekta og bayad nga way resibo gikan sa mga tinun-an sa nagkalainlain nilang training programs sa TESDA ug kabarangayan;

• Nisipong sa dagkong cash prizes sa niaging Kite Festival sa SRP pinaagi sa pagbutang og minao-mao nga contestants ug pag-forge sa mga pirma sa mga barangay kapitan;

• Gikapnan ang dakong budget sa Sinulog Foundation pagpamalit og mga buwak alang sa tinuig nga opening salvo sa Basilica del Sto. Niño;

• Gipanggamit sa kadagkoan ang higanteng props ug mga kurtina sa Cebu City contingent nga nangu sa Sinulog Mardi Gras; ug

• Pagda sa kahimanan sa DMDP ngadto sa kabalayan ug gigamit sa pribadong mga negosyo sa labing dagkong mga opisyal.

* * *

Di lang tulo kon dili lima ka gas range ang gipalit sa Cebu City Hall alang sa DMDP. Sa pag-retiro ni Aniceta Alo isip pangu sa DMDP sa niaging tuig, duha ra ka gas range ang nakit-an. Ang gas range nga nakuha sa niaging semana gikan sa panimay ni Gina Yosores, ang pag-umangkon ni Alo nga maoy napuli niya, gitoohang maoy ikatulo. Ang laing duha wa pa igkita. Maoy hinungdan nga si Alo wa pang kadawat sa iyang retirement benefits hangtod karon.

Kining kayagaw gikahadlokang di monopoliya sa DMDP. May sukaranan ang pagduda nga ang pagkawa sa kahimanan sa gobyerno ug palusot nga mga transaksiyon mao say nahitabo sa ubang departamento sa City Hall nga bisan sa iyang kaisog ug ka-istrikto wa mabaraw ni Osmeña.

* * *

Laing nakapahugno sa mga kawani sa DMDP mao ang paglingiw sa mga opisyal sa City Hall sa gipasangil nga immoral nga kalihokan ni Yosores. Usa sa gitumbok nilang tilimad-on mao ang pagpangunay sa bana ni Yosores pagsurender sa gas range sa ilang bay ngadto ni DMDP supply officer Elvira Tabada.

Sa wa pa mahimong tagulilong aron di katubag sa mga pasangil batok niya, si Yosores nitangtang ni Tabada. Morag nagsalig ni City Administrator Bimbo Fernandez nga gikatahong maoy nagrekomendar niya ug ni Mayor Osmeña nga maoy nagtudlo niya sa katungdanan.

* * *

Email: [email protected]