Puwerteng kisikisi sa Malakanyang sa editorial sa New York Times nga kusganong nisaway sa iyang pagdangop sa di demokratikanhong mga paagi pagbadlong sa nagkalapad nga protesta pagpalagpot niya sa katungdanan. Gitulisok dayon ni Press Secretary Ignacio Bunye ang mga lider sa oposisyon nga maoy naghilo sa hunahuna sa Estados Unidos ug ubang kanasuran sa sayop nga kasayuran nga sukwahi sa tinuod nga kahimtang sa Pilipinas. Angay lang nga malisang si Pres. Arroyo. Ang editorial sa Times nga nag-ulohan og "Dark Days for Philippine Democracy" maoy gibasa ni US Pres. George Bush sa iyang pamahaw sa White House niadtong Miyerkules. Kay ang Times, uban sa Washington Post, maoy labing gamhanang mga influencia di lang sa White House kon dili sa tanang sentro sa gahom sa Amerikanhong gobyerno. Ang panulisok ni Bunye, sama sa naandan, di makatabang sa kawsa sa Malakanyang. Sama rang iyang giinsulto ang Times nga nailad sa mga turutot sa oposisyon.
Si Bunye ang tinuod nga mangingilad. Mas matinud-anon ang Times kay sa iyang inadlawng pagarpar. Ang pagbunal sa mga demonstrador sa kadalanan, ang pagpahamtang og state of national emergency pila ka oras human ideklarar nga nadugmok nang plano sa kudeta, ang pagronda sa buhatan sa nasudnong pamantalaan nga wa motila sa palasyo, ug ang pagpapriso sa mga kongresista, retiradong mga heneral ug mga aktibista bisan way klarong mga ebidensiya di mga tilimad-on sa kamahigugmaon ni Pres. Arroyo sa demokrasya.
Apan ang politikanhong oposisyon utro sang mangingilad. Gipakatap dayon nilang text messages nga iresponsableng nikutlo ni Bush nga mao nay nagsulti sa awhag sa Times nga angayng pasidan-an si Arroyo nga ang iyang paglugpit sa demokrasya makahimo sa Pilipinas nga mas huyang batok sa mga terorista. Kon nahibung pa mo nganong pipila ray nanggawas sa kadalanan bisan kon mayoriya sa katawhan uyon nang palagputon si Arroyo pinaagi sa kudeta o people power, mao ni posibleng tubag: Way mapili sa administrasyon ug oposisyon.
Ang laing masulub-ong kamatuoran mao ang klarong nagkahiusang paghangad sa administrasyon ug oposisyon sa gahom sa Estados Unidos pag-influencia sa sangpotanan sa krisis nga padayong nihakop sa nasud. Editorial pa lang gani sa Times, wa pa gani ek si Bush ug ang mga opisyal sa iyang administrasyon, ang palasyo mora nang gilubatlubatan ug ang oposisyon mora nang gimilagrohan.
Ang editorial sa Times nagbisto sab unsay tinuod nga pagtan-aw sa Amerikanhong gobyerno sa nasud ug katawhang Pilipinhon. Wa maguol ang Times sa negatibong epekto ngadto sa katawhan kon mahitabo ang ilang gikahadlokan nga pagkahimong diktador ni Arroyo. Ang Times, sama sa ilang gobyerno, mas nabalaka nga kon magkaguliyang ang Pilipinas mawad-an silag lig-on ug kasaligang alyado sa kalibotanong gubat ni Bush batok sa terorismo.
Email:
leo_lastimosa@abs-cbn.com