Tulisok sa LGU

Guinsaugon, St. Bernard, Southern Leyte - Ang wa mahimo sa mga sakop sa media, nga puno sa pangikog nga nagsubay sa pagduma sa lokal nga mga opisyal sa labing bangis nga katalagman nga niigo sa nasud karong tuiga, natuman sa usa sa mga ilong tuwapos: Ang pagsudya sa mayor sa St. Bernard ug gobernador sa Southern Leyte nga diha sa iyang atubangan sa ilang mga bulilyaso sa pag-atiman sa mga biktima sa katalagman-ang mga patay ug ang mga buhi.

Ang naghilak nga tinun-an sa kolehiyo sa San Juan niasoy atubangan sa ubang mga biktima atol sa ika-40 ka adlaw nga sumad sa pagdahili sa yuta nga nitabon sa tibuok Guinsaugon nga ang patay'ng lawas sa iyang inahan morang isda nga baligya-gipasundayag sa publiko, way sapot ug gibutangag morang price tag nga papel.

* * *

Si Mayor Maria Lim sa St. Bernard sa iyang bahin nipakugang sab sa tanang nanambong: Nikumpisal nga wa siyay hibangkaagan pagduma sa katalagman ug nangayog pasaylo sa tanan niyang kasaypanan pagtubag sa labing dinaliang mga panginahanglan sa mga biktima.

Gipasabot ni Lim nga wa dayon masininai ang naugkat nga mga patay'ng lawas kay pulos nagkalapok ug kinahanglan pang liguon sa wa pa ma-autopsy. Gawas pa, human nabantayi nga gipadaylang lang ang mga patay'ng lawas alang sa tanang gustong motan-aw, bisan uwahi nang tanan, gitaptapan nila ang luna og trapal.

Gipasalamatan sab ni Lim ang abundang hinabang nga ilang nadawat nga, niya pa, maoy nakatapak sa labing dagko nilang kakuwangan. Gitataw hinuon niya nga kapin ra sa P4 milyones ang ilang nadawat ug giawhag ang ubang motabang sa di na pag-agi sa ubang ahensiya aron madawat sa mga biktima sa labing daling panahon.

* * *

Ang di maayong balita gikan ni Gobernador Rosette Lerias sa Southern Leyte: Mahimong madugangan pang kalangay sa pagtukod sa kabalayan nga kabalhinan sa mga bakwet sa Guinsaugon ug kasilinganang mga barangay. Kay gawas sa hinay kaayong paghawan sa relocation site sa Barangay Magbagacay, kinahanglan pang ipa-survey una ang luna sa Department of Environment and Natural Resources (DENR).

Gawas sa gibisto nato dinhi sa niaging semana nga pag-usab sa nahingpit na untang plano sa Gawad Kalinga, aron pagtuman sa lagda sa Estados Unidos nga motukod lang sila sa kasamtangang kabalhinan sa mga bakwet sa mga luna nga dunay titulo, sa makausa pa gisalikway na sang inusab nang plano pag-ipon sa tanang bakwet pinaagi sa pagpalit sa silingang mga luna sa Magbagacay kay segun ni Lerias adto ibalhin ang mga bakwet sa ubang barangay ngadto sa Catmon.

Samtang nagnukus-nukos ang lokal nga mga opisyal, padayong nangindahay ang nagbangotang mga biktima nga mahaw-as na sa di tawhanong kahimtang sa evacuation centers.

* * *

Email: [email protected]