Kabilin ni Tan

Pulihan si Dr. Jose Sal Tan isip presidente sa Cebu State College of Science and Technology (CSCST) karong Abril 1 nga magbilin og P20 milyones nga wa ikapatin-aw nga mga gasto ug mga benepisyo nga ipauli sa Commission on Audit (COA). Apil sa gikuwestiyon sa COA mao ang pagkobra nilang Tan ug kaubanan sa mosunod nga gikuwestiyon nga mga benepisyo:

• Pagkobra og P1.6 milyones gikan sa income generating programs (IGP) nga gilista ni Tan isip utang inay kita sa CSCST gikan sa Septiyembre hangtod sa Disyembre 2005;

• Pagkobra og P12.9 milyones nga honorarium gikan sa subjects nga giingong wa nila matudloi gikan sa 2004 hangtod sa 2005; ug

• Ang teaching personnel nakadawat og honorarium nga labaw sa 75% nga limitasyon sa Department of Budget and Management (DBM).

* * *

Ang labing dakog taplanan sa nasudnong panudlanan tungod sa disallowances gikan sa 2003 hangtod sa 2005 mao ang, nakatag-an mo, labing dagkong opisyal sa CSCST nga gipangulohan ni Tan kinsa gipauli sa COA og P1.59 milyones. Nagsunod niyang labing dagkog kuwentahunon maong mosunod niyang mga sinaligan:

1.Victor Villaganas - P1.3 milyones;

2.Rodolfo Burgos - P1.2 milyones;

3.Cecilia Elena de los Reyes - P821,770;

4.Hercules Allera - P737,179;

5.Corazon Soco - P581,119;

6 Panfilo Ciriaco - P530,771;

7.Cecilio Baga - P498,410;

8.Cynthia Sy - P496.512;

9.Gil Piramide - P448,409;

10.Irwin Allego - P410,689;

11.>Teresita Rojas - P388,979; ug

12.Maximo Limpiado - P325,315.

* * *

Napamatud-an sa COA nga tinuod gyong minahan sa bulawan ang CSCST-alang nilang Tan ug kaubanan. Kay gawas sa makabungog nga honorarium nga ilang gikobra bisan gidid-an sila sa COA ug DBM, nagpiyesta pa gyod sila pagbolsa sa gikuwestiyon sang mga insentibo sa IGP. Sa kataposang tulo lang ka buwan niadtong 2005, silang Tan ug kaubanan morang nagtimba og kuwarta gikan sa panudlanan sa CSCST:

1.De Los Reyes - P174,950;

2.Piramide - P165,500;

3.Tan - P146,000;

4.Burgos - P141,250;

5.Allego - P133,000;

6.Villaganas - P114,000;

7.Allera - P102,000;

8.Limpiado - P59,000;

9.Maria Reyes - P46,000;

10.Soco - P45,000;

11.Mark Lastimosa - P42,000; ug

12.Rojas - P38,000.

* * *

Niang uban pang transaksiyon sa CSCST nga gikuwestiyon sa COA:

• Pipila sa honorarium nilang Tan ug kaubanan wa pahamtangi og withholding tax apan wa ni kapugong nila pagkobra og tax refunds nga niabot og P418,000;

• Ilegal nga nangobra ang mga kawani sa P3 milyones nga rice allowance, P2.2 milyones nga medical and cultural allowance ug P1.75 milyones nga can (collective negotiation agreement) niadtong 2004; ug

• Ang CSCST namayad og mga ekipo nga wa pa mahatod ug gasolina nga wa pa matobil, nanghatag og computer sa CHED nga way resibo ug namalit og duha ka aircoditioning units nga gipasagdan lang sud sa bodega.