Mga boluntaryo

Karong Martes, Marso 28, ang ika-40 ka adlaw human sa katalagman sa Guinsaugon, St. Bernard, Southern Leyte. Sama sa naandan, ug kamatuoran nga mas gamhanan ang tradisyon kay sa bangis nga katalagman, ang santos nga misa nga saulugon sa Simbahang Katoliko sundan sa dakong kumbira nga giandam sa munisipyo.

Nianang adlawa, ang DYAB Abante Bisaya ug ABS-CBN Cebu mohatod pinaagi sa Sky Patrol sa mga tinun-an sa Guinsaugon nga nigradwar karong buwana sa ilang mga kurso sa mga eskuylahan dinhi sa Sugbo ngadto sa lapad nga dahili sa yuta nga gituohang nalubngan sa ilang mga ginikanan ug ubang mga sakop sa pamilya.

Mao ni among tubag sa hangyo sa mga tinun-an nga makahalad sa nangamatay nilang mga kapamilya ang malampusong pagtapos sa ilang mga kurso bisan sa lisod nga pagsuway nga ilang nahiagoman.

* * *

Ang tanang 16 ka mga tinun-an sa Guinsaugon nga nia mag-eskuyla sa Sugbo gipasidunggan sa Junior Chamber International (JCI) Central Visayas ug ubang mga tigpasiugda sa ilang scholarship fund niadtong Biyernes. Gihalaran silag Santos nga Misa sa Redemptorist Church pagka hapon, dayon gibangkahan og panihapon sa Big Gerry's nga gipanag-iya ni Cebu City Councilor Gerardo Carillo, nga hingpit sang nipaluyo sa nagpadayong kampanya pagtigom og pondo nga igong makapatiwas sa ilang pag-eskuyla sa mosunod nga upat ngadto sa lima ka tuig.

Ang mga representante sa JCI, Cebu City Government ug Kapisanan ng mga Brodkaster ng Pilipinas (KBP) isig angkonay sab sa niaging semana og mga gradwado nga ilang giubanan pagpaso pagdawat sa ilang mga diploma sa University of the Visayas (UV) ug University of Cebu (UC). Ang kataposang gradwado mopaso karong Lunes, Marso 27.

* * *

Tuguting akong pasalamatan dinhi ang mga boluntaryo sa labing dakong paghipos sa mga hinabang gikan sa mga Sugboanon alang sa mga biktima sa katalagman sa Southern Leyte. Ang Kapamilya Relief Campaign sa DYAB Abante Bisaya ug ABS-CBN Cebu nakakolekta sa gibanabanang P20 milyones nga balor sa sinakong bugas, linatang sardines, pinutos nga noodles ug mga gamit sa bay.

Ang mas lisod nga gimbuhaton pag-repack sa relief goods ug paghatod nila ngadto sa mga biktima natuman tungod sa hingpit nga pag-unong sa mga boluntaryo nga way kutas sa pag-amot sa ilang kahago ug panahon, adlaw ug gabii, sa ABS-CBN Regional Broadcast Complex nga sa niaging pila na ka semana nahimong higanteng relief operations center.

Sa pagda sa upat ka hugna sa relief goods ngadto sa Southern Leyte ang mga boluntaryo way kakapoy nga nikarga-diskarga ug nibantay sa mga hinabang sa mga Sugbuanon. Salamat sa mga boluntaryong Sugbuanon, labi nang Barangay Kapitan Joel Garganera nga lumad nga taga St. Bernard, natuman sa ABS-CBN ang tahas nga gisangon sa mga Sugbuanon pagpabaha sa ilang kamanggihatagon ngadto sa makaluluoyng mga biktima sa katalagman.

* * *

Email:[email protected]