Salamat, Talisay!

Mangayo kong daan sa inyong pasaylo, supakon na sab nako sa makausa pa ang lagda ning akong lindog: Maghisgot ko sa akong lindog. Palabihon unta nakong magpakahilom kay sa pasanginlan nga nibulhot sa akong kaugalingong turutot. Pero nakaseguro kong di krimen ang pagpasalamat ug mas dakong atraso ang pagluom unsay tinuod nga gisiyagit sa akong galamhan.

Hangtod ning akong pagsuwat, di pa kong katoo nga usa ko sa gipasidunggan sa Syudad sa Talisay atol sa ikalima nilang charter day niadtong Huwebes. Dihang nakadawat ko sa imbitasyon ni Gale Cabigas, gipakaingon nakog ila ra kong giulog-ulogan. Pero puwerteng kuganga sa dakong suwerte dihang nailhan nakong ubang Talisaynon nga gipasidunggan: RTC Judge Simeon Dumdum Jr., Heneral Santos Gabison, retiradong hepe sa Visayas Command, Provincial Board Member Juan Bolo ug ang bantogang si Julian "Teban" Daan.

* * *

Sa di ka pa moingon nga naghilashilas ko, pahibaw-on tika nga sa unang pagtaak nako sa Talisay niadtong 1978, magbaktas ko gikan sa San Isidro paingon sa Poblacion aron lang makaapil sa programa nilang Inday Nita Cortez-Daluz ug Tony Avila sa DYRE ug kinahanglang manghuwam kog makinilya sa akong Tiyo Loring sa Tabunok aron makasuwat sa akong mga tampo para sa The Freeman, Bisaya ug Adventures of Johnny Pusong ni Art Maloy sa DYRC.

Maong dihang akoy ilang gipadiskurso para sa mga gipasidunggan atubangan nilang Gobernador Gwen Garcia, Kongresista Eduardo Gullas, Mayor Soc Fernandez ug ubang opisyal sa Talisay, naglugos paggawas ang akong tingog (katin-awan sa gobernadora: Nilumpayat ang akong kasingkasing ngadto sa akong tutonlan).

Nahadlok kong taas ug emosyonal kaayong akong diskurso niadtong Huwebes sa gabii, maong wa na koy laing masulti: Daghang salamat, Talisay!

* * *

Pormal nang gilusad dinhi sa Sugbo ang Citizen Patrol, ang giatangan nga segment sa TV Patrol World. Ubos sa pagduma ni Nene Tamayo, ang mananaog sa unang season sa Pinoy Big Brother, ang segment ilusad sab sa uban pang rehiyon sa tibuok nasud aron paghatag og tingog sa katawhan nga may lehitimong mga reklamo ug mga panginahanglan aron kaaksiyonan dayon sa mga ahensiya sa gobyerno o pribadong sektor. Nitambong sa paglusad sa sports complex sa Barangay Pahina Central silang Cebu City Mayor Tomas Osmeña, Kongresista Raul del Mar, Bise Mayor Michael Rama, First Lady Margot Osmeña, Konsehal Edgardo Labella, Konsehal Gerardo Carillo, Kapitan Sisinio Andales ug TV Patrol Anchor Ted Failon.

Ang lokal nga Citizen Patrol nga makita na sa TV Patrol Central Visayas maoy mamahimong pahungawanan sa mga Sugbuanon nga nahiagom gikan sa labing yanong mga problema ngadto sa labing dagkong mga panginahanglan nga nagkinahanglan na sa pagpanginlabot sa nasudnong gobyerno. Hinaot nga mahimo ning kahimanan pagdasig sa katawhan pagsalmot pagpangita og kasulbaran inay magpadayon sa naandang pagbagulbol lang sa nahiagomang mga problema.

* * *

Email: [email protected]