Suod pero away?

Ang duha ka labing sinaligang mga babaye sa kinabuhi ni Mandaue City Mayor Teddy Ouano ang nahimong taytayan sa panag-abot nilang Kongresista Nerissa Soon-Ruiz sa Plantation Bay niadtong Disyembre 23. Sila si Cheryl, umagad, nga gikaabot ni Ruiz sa Asean Summit sa Kuala Lumpur, ug Linda, asawa, nga gikasugat ni Ruiz sa shopping mall sa Manila, ang nakigsabot sa oras ug lugar. Si Cheryl ang kaistorya ni Ruiz sa telepono sa pagdungan og biya sa duha ka pamilya gikan sa Mandaue paingon sa tigom sa Opon.

Pero niinsistir si Ruiz nga ang klarong nagkaistorya mao rang mga pangu sa duha ka pamilya, silang kanhi mayor Alfredo "Pedong" Ouano ug Dr. Restituto "Toto" Soon. Kinsa emosyonal nga nilab-as sa kasuod sa ilang kagahapon pinaagi sa paghisgot sa ilang panagkuyog sa ikaduhang gubat sa kalibotan ug pagsuporta sa mga Osmeña. Matod ni Ruiz gihikay niya ang tigom kay dugay nang nangandoy ang iyang amahan nga magkauli ang maayong kabubut-on sa duha ka pamilya nga naputol tungod sa higpit nilang panagribal ni Mayor Ouano.

Atol sa interview sa DYAB Abante Bisaya, gipasaligan hinuong Ruiz ang iyang mga dumadapig nga ang tigom wa magpasabot nga magkahiusa nang duha ka pamilya sa politika.

* * *

Matod ni Ruiz nga bisan pa kon abli nang ilang linya sa komunikasyon ni Mayor Ouano, magpadayon ang ilang mga paningkamot pagmatuod sa mga pasangil sa pangurakot batok sa usag-usa: Si Ruiz namasangil nga kuwestiyonable ang pagpanag-iya sa mga Ouano sa mga prangkisa sa Jollibee; samtang si Ouano namasangil nga labaw pang kuwestiyonable diin gikan ang kuwarta nga gitukod ni Ruiz sa bag-o niyang bay sa Casili, Mandaue.

Matod ni Ruiz di masakripisyo ang interes sa publiko bisan pa kon ang mas suod nga relasyon sa duha ka pamilya moresulta gyod sa pagka-areglo sa ilang mga pasanginglanay kay masaligon siya nga magpadayon ang imbestigasyon sa Visayas Ombudsman. Duna koy balita parang Ruiz: Giyak-an na man ganing daan sa Ombudsman ang mga kaso niadtong nagpinahitay pa sila, unsa na kaha karon nga gawas nga nahibalik nang kasikit sa ilang masigka amahan, nabanhaw pa gyong ilang tinawganay sa mayor nga "mare" ug "pare?"

* * *

Nakapahimus dayon sa kasuod nilang Ouano ug Ruiz ang mga molupyo nga mag-agian sa Canduman road. Nga sementado unta pero dali rang makankan sa uwan kay nakalimtan sa mayor pagbutang og kanal.

Si Ruiz nga kanunayng makaagi sa dan nagpalaban dayong Cheryl, kinsa nikuhit sab dayon sa mayor. Morang kilat nga nahimoag program of work ug natapakan og bagang aspalto niadtong Martes.

Kinahanglan bang mangluhod sab atubangan sa mayor ang uban niyang politikanhong kaatbang una maatiman ang nagusbat nga kadalanan ug ubang batakang panginahanglan sa ilang lugar?

* * *

Email: [email protected]