FVR paduding?

Nagpadungug-dungog na ba sab si kanhi presidente Fidel Ramos? Wa na ba sab siya matarung pagtagad sa Malakanyang? Kay gihimo na sang Ramos ang naandang bisyo pagpanghudlat sa administrasyon kon mohana og likoy si Pres. Arroyo sa pagtuman sa iyang mga rekomendasyon.

Ambot tungod ba kaha kay naluya na sang kampanya pag-usab sa konstitusyon, si Ramos mora nang lider sa oposisyon nga niawhag ni kanhi Comelec commissioner Virgilio Garcillano sa pagtug-an sa kamatuoran aron kasilotan si bisan kinsang nanikas sa eleksiyon sa niaging tuig. Mas igo hinuon ang administrasyon sa hubad ni Arsobispo Oscar Cruz sa krisis sa nasud: Angayng tak-opan nang imbestigasyon sa Garci scandal kay, tungod sa daghan ug nagkasungi nga pamakak sa palasyo nabisto, nang kamatuoran sa lapad nga tikas sa eleksiyon ug angayng sundon sa presidente ang tambag sa Catholic Bishops Conference of the Philippines sa pag-resign.

* * *

Malampusong gilusad ni Arsobispo Ricardo Kardinal Vidal ang "Radiothon" uban sa Kapisanan ng mga Brodkaster ng Pilipinas (KBP Cebu Chapter) para sa Save-Our-Souls (SOS) Children's Village, ang bugtong institusyon sa Sugbo nga naghatag og permanenteng pinuy-anan ug hingpit nga edukasyon para sa mga bata nga ilo o gisalikway sa ilang mga ginikanan. Ang pagpanguha og mga donasyon gikan sa nagpakabanang mga Sugbuanon gilusad pinaagi sa mensahe ni Kardinal Vidal nga nabati sa tanang estasyon sa radyo sa Sugbo nga sakop sa KBP gikan sa conference room sa Archbishop's Palace sayo gahapon sa buntag dungan sa pagtimaan sa International Human Rights Day.

Segun ni Kardinal Vidal duna karoy 126 ka bata sa SOS Children's Village. Uban sa imong hinabang, makaamuma sila og dugang pang mga bata sa padayong gitukod nga ika-12 nga Jubillee house nila sa Talamban. Kon gusto kang motabang, palihug tawga ang SOS (032-3460969) o ang inyong paboritong mga estasyon sa radyo sama sa DYAB Abante Bisaya (032-5643203 o 032-4221953).

* * *

Si Kardinal Vidal nagsugod pagtabang sa SOS sa siya pay obispo sa Lipa City sa Batangas nga maoy labing unang nakatukod og SOS Children's Village niadtong 1973. Isip tsirman sa Board of Trustees sa SOS sa Sugbo, si Kardinal Vidal nisugyot og tulo ka paagi paghatag sa imong hinabang:

•Paghatod sa imong donasyon ngadto sa SOS sa Talamban, Cebu City;
•Paghatod sa imong donasyon sa imong gisaligan nga estasyon sa radyo ug telebisyon nga sakop sa KBP; o
•Kuhaon ang imong donasyon sa mga representante sa SOS nga magda og ID ug opisyal nga resibo. Gihangyo ni Kardinal Vidal ang mga way lingaw sa di na lang paglawgaw sa kalihokan. Gitambagan sab niyang mga motabang sa pagtawag una sa SOS sa di pa mohatag og donasyon ngadto ni bisan kinsang magpaila nga representante sa institusyon.

* * *

Email:[email protected]