Kinsay nagdupa?

May sukaranan ang mga magtutudlo, mga kawani ug mga tinun-an, nga nangreklamo sa makabungog nga honorarium nga gibolsa nilang CSCST Pres. Jose Sal Tan ug kaubanan, nga magduda sa kaligdong sa auditors sa Commission on Audit (COA) nga nadestino sa eskuylahan. Silang Sonia Dejacto ug kaubanan gipasanginlan ni Dr. Godofredo Loremia, presidente sa faculty and employees association, nga nanawat sa mosunod nga mga pabor gikan ni Tan:

• Laptop computers;
• Mahalong cellular phones;
• Teaching load; ug
• Pagpatrabaho sa ilang mga paryente sa CSCST.

Mao diay nga hangtod karon, kapin na sa duha ka tuig human gidili sa Department of Budget and Management (DBM) ang honorarium, wa pa gyoy bisan usa ka dako sa minilyon ka pesos nga ilegal nga gikolekta nilang Tan ug kaubanan.

* * *

Nakapait kay ang morang umang nga imbestigasyon sa COA mao ra say giagad sa Visayas Ombudsman. Gipasabot ni Direktor Virginia Palanca-Santiago sa DYAB 1512 khz Abante Bisaya nga baleg unom ka buwan rang honorarium ang iyang gisugo nga ipauli kay wa pa mahuman ang kuwentada sa COA pila ang kinatibuk-ang honorarium nga ilegal nga nakolekta nilang Tan ug kaubanan sukad niadtong 2003.

Di kaha maayong pa-esplikaron ni Santiago ang COA nganong nag-unang findings sa 2005 kay sa 2003 ug 2004? Nagpasabot ba ning nagmika ang COA maong naabtan silag duha ka tuig una nakabantay sa dakong anomaliya? Ug di kaha maayong imbestigahon sang Santiago silang Dejacto ug kaubanan unsaon pa man nila pagbaraw sa mga binuang sa CSCST nga puwerte na man nilang buhonga sa klarong mga suburno nga gilawog ni Tan ngadto nila?

Ug unsa may nakapahilom sa labaw'ng mga opisyal nilang Dejacto sa COA? Nganong mora man silang nakatun og tambasakan atubangan ning pakauwaw sa auditors nga ilang gidestino sa CSCST?

* * *

Bisan ang Ombudsman gidudahan sab sa grupo ni Loremia. Kinsa nipasangil nga nagkasuod pag-ayo silang Tan ug Deputy Ombudsman Primo Miro human gilibre ni Tan ang desinyo sa Ombudsman building. Ang presidente sa Parents-Teachers Association (PTA) sa CSCST giingong opisyal sab sa Ombudsman. Gikuwestiyon sab nganong igo rang gipauli ang honorarium ug way napahamtang nga mas bug-at nga silot.

Nipasabot si Santiago fact-finding pang ilang gihimo. Unya na sila momando og preventive suspension batok nilang Tan ug kaubanan kon pormal nang mapasakaan og kaso. Nipasalig si Santiago nga di maka-influencia sa imbestigasyon ang kasuod nilang Tan ug Miro. Ug bisan pa kon usa sa mga gipasanginlan, si CSCST Vice Pres. Victor Villaganas, maoy ilang resident Ombudsman sa tibuok CSCST system. Matud ni Santiago hapit na siya moretiro busa di mahitabong iyang bulingbulingan ang iyang kadungganan pinaagi sa pagdupa sa iyang mga suod.

* * *

Email: [email protected]