Wa magkadimao

Inay mopatin-aw sa lubog nga sitwasyon sa nasud, si Presidente Gloria Macapagal-Arroyo, pinaagi sa iyang duha ka makapakugang nga mga lakang karong semanaha, nidugang na hinuon sa kalibog sa katawhan:

Niadtong Lunes sa gabii, nideklarar siya sa nasudnong radyo ug telebisyon nga tin-awon ang kontrobersiya sa audio recording sa giingong panag-istorya nilang kanhi Comelec Commissioner Virgilio Garcillano, pero ang iyang mensahe wa maghisgot sa mga sirkumstansiya sa paghimo sa recording;

Niadto gihapong Lunes sa gabii, nangayo siya og pasaylo pero way giangkon nga bisan unsang krimen; ug

Niadtong Miyerkules sa udto, gipahibawo niyang molarga paingon sa gawas sa nasud ang iyang bana, si First Gentleman Mike Arroyo, sa way pagklaro unsay iyang nahimong atraso.

* * *

Di tinuod nga boluntaryo ang pagbiya sa bana sa presidente. Napugos na lang si Presidente Arroyo pagpalayas niya tungod sa hulga sa mga sakop sa gabinete nga mamiya sila sa puwesto kon di i-exile ang iyang bana. Niadto pang Biyernes nga gihimo sa 12 ka mga sakop sa gabinete ang demanda, pero nagkinahanglan ang presidente og lima ka adlaw una nakatuman sa ilang gipangayo.

Way apil sa demanda ang pagpalayas sab ni Kongresista Mikey Arroyo, anak sa presidente. Pero puslan mang nibakasyon siya gikan sa Kongreso, pakuyugon na lang sab sa paglarga sa iyang amahan unya sa Hulyo 5. Pero ambot unsaon sa presidente ang iyang bayaw, si Kongresista Iggy Arroyo, kinsa niinsistir nga, ug hinaot wa siya magpadungog-dungog sa presidente, duna siyay mandato sa mga botante sa iyang distrito ug busa kinahanglan niya silang alagaran.

* * *

Kabahin na sa lapad nga lahugay sa administrasyon ang resignasyon ni Agriculture Secretary Arturo Yap kinsa gikiha sa BIR og tax evasion. Nipasidaan si Kongresista Joey Salceda, ang nangangkong suod nga alyado sa presidente, nga manghod lag dyutay sa masaker ang mahitabong tinaktakay sa mga batos ni Mike Arroyo gikan sa gabinete ug higanteng mga korporasyon sa gobyerno.

Kon tinuod nga determinado si Presidente Arroyo paglimpiyo sa iyang administrasyon ug pagpasiugdag kausaban aron mahibalik ang pagsalig sa katawhan, nganong mora man siyang nagdata-data og utang? Natarantar na ba gyod maong wa magkadimao ang mga lakang pagtapak sa higanteng buslot sa iyang kaligdong ug katakos sa pagduma sa nasud?

* * *

Kon hinayunon pagtangtang ang mga gaway sa iyang bana, bisan uwahi na, mahimong dayegon siya sa pipila ka mga grupo. Pero nipasidaan ang usa ka beteranong peryodista nga ang lahugay makahimo og bag-ong mga kaaway sa administrasyon.

Gawas nga magbagulbol nganong giduhig ang ilang raket nga presidente ra man untay nasakpan, ang taktakong mga opisyal mahimong naghupot og dugang ebidensiya nga makadaot sa unang pamilya. Nga kon mapagawas, mas mopatulin sa ilang pagkalagpot sa gahom.

* * *

Email: [email protected]