Torre ‘pahinga’ ng isang buwan - MMDA

MANILA, Philippines — ‘Pahinga’ muna si Metropolitan Manila Development Authority (MMDA) General Manager Nicolas Torre III kasabay ng isinasagawang imbestigasyon ng Land Transportation Office (LTO) sa pagkakasangkot ng kanyang sasakyan sa ilang paglabag.

Kinumpirma ito kahapo ni MMDA Chairman Romando Artes, na nagsabing epektibo kahapon, Setyembre 8 ang isang buwan na leave ni Torre.

Ani Artes, nirerespeto niya ang desisyon ni Torre sa boluntaryong pagbabakasyon, habang nananatili pa rin ang kanyang tiwala sa performance nito sa ahensiya.

“I have full trust and confidence in GM Torre as far as his work is concerned. The MMDA respects Gen. Torre’s decision and wishes him well during his period of leave to give him sufficient time to reflect,” ani Artes sa isang pahayag.

Ipinaubaya naman ng MMDA sa LTO ang imbestigasyon sa isyung kinasasangkutan ng opisyal. Iginiit ni Artes na walang opisyal, anuman ang posisyon o ranggo, ang exempted sa traffic laws at regulations.

Samantala, ni-revoke na ng LTO ang driver’s license ng driver ni Torre matapos dumaan sa EDSA Busway at pagkakabit ng mga hindi awtorisadong kagamitan at marka. Kabilang sa mga nakadikit sa sasakyan ni Torre ang body number, sirena at blinker.