Mas paspas nga husay
Dili na maabtan sa Valentine’s Day sa 2027 ang impeachment trial ni Bise Presidente Sara Duterte. Mahimo ganing dili na maabtan sa Pasko 2026. Kana kon matuman ang pasalig ni Senate President Sherwin Gatchalian nga mahimong mahukman na sa senator judges absuwelto o konbikto ba si VP Sara karong Disyembre.
Dili hinuon makabuot si Gatchalian. Usa ra siya ka boto sa impeachment court. Pero siya ang pangulo sa majority bloc nga dunay 13 ka sakop (batok sa walo ra sa minority bloc). Ang desisyon nilang Gatchalian ug kaubanan ang matuman.
* * *
Nahukman na sa mayoriya (igo na lang pahibaw-on ang minoriya sa caucus ugma, Lunes) ang mosunod:
Ibalhin ang husay gikan sa alas-10 sa buntag ngadto sa alas-2:30 sa hapon sugod karong Septiyembre 1;Gawas nga mas taas ang oras (mahimong lugwayan hangtod sa lawom nga gabii kon gikinahanglan) dugangan og laing usa ka adlaw ang husay kada semana (nga karon Lunes, Martes ug Miyerkules ra); ugTiwason sa usa lang ka adlaw ang testimoniya sa usa ka testigo (direct ug cross examination ug clarificatory questions sa senator judges).
* * *
Nipasalig dayon ang House panel of prosecutors nga mahuman ang pagpresentar sa ilang mga ebidensiya ug mga testigo karong Septiyembre. Aron dunay duha ka buwan (Oktubre ug Nobyembre) ang kampo ni VP Sara pagpakita sa ilang depensa.
Mahimong dili ipatawag silang Koronel Raymund Lachica, Koronel Dennis Nolasco ug Ramil Madriaga. Kon kumbinsido ang prosekusyon nga mapamatud-an na nilang pataka nga gasto sa confindential funds sa mga testimoniya nilan g disbursing officers Gina Acosta ug Edward Fajarda.
* * *
Nipasalig si Atty. Michael Poa, tigpamaba sa depensa, nga tumanon nilang bisan unsang kausaban nga ipatuman sa impeachment court. Angay hinuong hinumdoman nga ang ubang defense lawyers dili sama kamahigalaon, ug busa dili sama kamasinugtanon, ni Poa.
Gidudahan nga lahi ang memorandum gikan ni VP Sara ang nadawat nilang Atty. Sheila Sison ug kaubanan. Kansang walay tumong nga objections ug cross examination giisip nga panglawgaw ra sa husay. Ambot duna bay kopya (ug kon duna man, wala ba kaha hilasi) sa press release ni VP Sara nga niawhag sa mas paspas nga husay aron pagpatigbabaw sa accountability ug transparency.
- Latest
