EDITORYAL — Basura, baha, negosyo?

Nabantayan sa bag-ohay lang nga sagunson nga pag-ulan sa Metro Cebu ang paspas kaayong pagsaka sa tubig baha diha sa kadalanan ug nanulod na gani sa mga kabalayan.

Sa miaging semana, mura og nahimong sapa ang mga dalan sa Barangay Tisa sa Cebu City human sa grabeng pagsaka sa tubig gikan sa mga sapa.

Ang sama kalawomon nga baha diha sa ilang dalan nakapakurat sa mga residente tungod kay wala pa ni sukad nahitabo sa ila sa una.

Kung ang ubang mga lugar nga dili bahaon kaniadto gilunopan, samot ang sitwasyon sa mga kaniadto problemado na kaayo sab aha matag mobunok ang kusog nga ulan sama sa barangay Mabolo, sa Lahug, sa Pari-an , Tejero ug uban pa.

Karong bag-o, si Cebu City Mayor Nestor Archival niingon nga basura maoy nag-unang hinungdan nganong grabe ang pagbaha nga nasinati karon sa siyudad.

Tungod ba kaha ni kay naglisod na ang siyudad pagpangita og kasulbaran sa problema sa basura sukad nga nasirado ang Binaliw landfill?

Kung mao ni ang nahitabo apan wala lang kaayo mabanatayi sa publiko, dili na ikahibulong kun nganong ini og ulan paspas kaayong mabara ang mga kanal, imburnal ug mga kasapaan maong moawas ang tubig diha sa kadalanan ug ngadto sa mga kabalayan.

Hangtud dili makabaton og kaugaling material recovery facility ang matag barangay para sa ilang mga basura, magpadayun kini nga problema hangtud sa hangtud.

Makapaduda na hinuon sa katawhan kun ginegosyo nalang gyud ning koleksyon sa basura sa pipila ka mga lokal nga opisyal maong walay gustong seryusohon ang proyektong makabaton og kaugalingong MRFs ang mga LGUs.