Feasibility study sa MRT gilaomang masugdan na

CEBU, Philippines — Gilaoman nga masugdan na ang feasibility study alang sa underground MRT sa Metro Cebu, usa ka proyekto nga gitumong aron makatabang sa problema sa trapiko sa rehiyon.

Gihisgutan kini atol sa Regional Development Council (RDC)-7 Full Council Meeting nga gipahigayon sa Dakbayan sa Danao niadtong Miyerkules.

Gihisgotan ni Cebu Governor Pamela Baricuatro ang plano alang sa underground MRT diin usa kini sa dagkong imprastraktura nga gitumong sa administrasyon aron mapalambo ang transportasyon sa Metro Cebu.

Matud ni Department of Economy, Planning and Development (DepDev)-7 Director Jennifer Bretaña nga kabahin ang MRT sa Metro Cebu Urban Transport Master Plan nga dugay nang gihimong giya sa pagpauswag sa transportasyon sa rehiyon. Gipadayag ni Bretaña nga dili igo nga adunay Bus Rapid Transit (BRT) lang o MRT lang aron masulbad ang problema sa trapiko.

Gibutyag ni Bretaña nga sa orihinal nga plano ang MRT unta ang mosunod nga proyekto human sa BRT apan bisan wala pa kini mahuman nakahukom na ang Department of Transportation (DOTr) nga pundohan ang feasibility study alang sa MRT.

Base sa taho nga gipresenta sa RDC meeting ang P426 milyones nga igahin nga pundo alang sa feasibility study sa gitawag nga Cebu Urban Mass Rapid Transit o Metro Cebu Subway Project.

Gilaoman nga sugdan sa Oktubre 2026 ang maong pagtuon aron masusi ang pamaagi sa pagpatuman sa proyekto.

Ug kong mapadayon, ang gitun-an nga central line sa MRT mokonektar kini gikan sa Dakbayan sa Danao hangtud sa Dakbayan sa Carcar.

Adunay plano usab nga linya paingon sa Mactan-Cebu International Airport ug uban pa’ng rota sa amihanan ug habagatan sa Metro Cebu. BDB BANAT NEWS