Talisay City Mayor's Cup 2024 mosikad na karong adlawa

CEBU, Philippines — Gatusan ka mga atleta ang magdangop karong adlawa alang sa pormal nga seremonyas sa pagbukas sa Talisay City Mayor's Cup 2024 didto sa Talisay City Sports Complex sa Barangay Poblacion.

Sila si mayor Gerald Anthony "Samsam" Gullas Jr., vice mayor Richard Francis "Choy" Aznar, ug ang uban pang mga opisyales sa Talisay LGU ang gipaabot nga motambong sa boggang kalihukan nga magsugod pinaagin sa tradisyonal nga parada sa mga atleta sa alas-2 sa hapon.

Si Jeanneth Villagonzalo sa Talisay City Sports Commission nagkanayon nga ang tinuig nilang paugnat sa kusog pagasalmotan sa tanang 22 ka mga barangay sa dakbayan.

Miabot ngadto sa 78 ka teams ang mopakita'g aksiyon sa basketball ug 40 sa volleyball. Tungod sa pagkadugang sa boys 12 Under ug girls U16 3x3, lima na ka dibisyon ang kumbatihan sa basketball ning higayon.

Ang uban mao ang boys U16, U20, ug U30.

Samtang ang volleyball adunay lima ka mga kategoriya. Kini mao ang mixed 12 Under, ug ang men's ug women's 20 Under.

Ang ubang mga events sama sa volleyball open, boxing, chess, badminton, futsal, sepak takraw, cycling, shooting, table tennis, ug push bike ipahigayon karong Septiembre ug Oktubre padung sa selebrasyon sa tinuig nga pista sa Talisay agi'g pahinungod sa minahal nilang patrona nga si Sta. Teresa de Avila karong Oktubre 15.