Olympics basketball: France nakaipsot sa Japan, mitikang sa quarterfinals
CEBU, Philippines — Ang host France nakalingkawas batok sa Japan, 94-90, aron pag-angkon og luna sa quarterfinals sa Paris Olympics men's basketball didto sa ilang tugkaran.
Ang four-point play ni Matthew Strazel sa hilimatyong segundos sa regulasyon maoy nagduso sa duwa ngadto sa overtime.
Si Victor Wembanyama maoy nangu sa France uban ang 18 puntos ug 11 ka rebounds apan si Strazel mikuha sab og atensiyon sa iyang pagkamabayanihon.
Gi-foul si Strazel samtang milansang sa krusyal niyang tres sa nahibiling 11 segundos sa duwa ug dayon kalmadong mipasud sa iyang free throw hinungdan sa dugang singko minutos sa aksiyon.
Sa overtime, si Wembanyama na ang misalida diin siya mibubo og walo sa 10 puntos sa France.
Bitbit ang 2-0 rekord, ang France garantisado na og luna sa Final 8 uban sa Germany, nga nakasagunson sab og daog human gilabhan ang Brazil, 86-73.
Ang Canada nanoktok na sab sa quarterfinals human gibuhga ang Australia, 93-83.
Ang Spain namawi sa miagi nilang kapildihan ug gipahimungtan sa ilang kapungot ang Greece, 84-77.
- Latest
