Garcia: Walay imbestigasyon sa discrepancies sa track oval

CEBU, Philippines — Walay pormal nga imbestigasyon nga gilusad aron masuta ang manubag kabahin sa lining discrepancies sa Cebu City Sports Center (CCSC) track oval matud ni Acting Cebu City Mayor Raymond Alvin Garcia.

Ang konseho sa siyudad nilabang og resolusyon nga nag-awhag sa buhatan ni Garcia sa pagsumiter og resulta sa imbestigasyon tungod kay nangita usab sila og hustisya sa mga atleta kansang resulta na-nullified tungod sa substandard nga track oval.

Sa regular session niadtong Hulyo 24, 2024, si Konsehal Mary Ann de los Santos niluwat sa iyang privilege speech kalabot sa bag-o lang nahuman nga Palarong Pambansa. Bisan pa sa malamposon nga pagtapos niini si de los Santos nagkanayon nga adunay usa ka sayop nga kinahanglang sulbaron.

Subay niini, niduso usab siya og laing resolusyon nga naghangyo sa buhatan ni Garcia nga ihatag ang resulta sa imbestigasyon sa critical error nga giatubang atol sa Palarong Pambansa 2024.

Gitumbok ni de los Santos ang track oval sa CCSC nga maoy nag-unang venue sa pipila ka sporting events nga alang kaniya nahimong kaulawan sa Dakbayan sa Sugbo. Ug gumikan niini 11 ka record sa Palaro ang wala gi-recognize nga nakaapekto sa 19 ka atleta gikan sa lain-laing rehiyon.

Sa press conference kagahapon giangkon ni Garcia nga wala silay gihimong imbestigasyon kalabot sa maong isyu. Gipasabot ni Garcia nga kini tungod kay kong mangutana ang gobiyerno sa contractor, ang contractor mobasol usab sa marker.

Matud ni Garcia nga ilang gisusi ang isyu, ang technical committee gilangkuban unta sa mga eksperto nga ang uban sakop sa Philippine Athletics Track and Field Association (PATAFA) partikular na si Jeanette Obiena kinsa maoy technical consultant sa Palaro.

Gipadayag ni Garcia nga naglibog siya nga si Obiena ang niingon nga substandard ang oval nga mao kini ang nagdumala sa mga marking.

Ug nihatag na sila og direktiba nga i-refurbished ang track oval sa higayon nga mahuman na ang pag-host sa Pasigarbo sa Sugbo 2024 karong Agosto 25, 2024 nga ipahigayon diha sa CCSC.

Dugang ni Garcia nga ang track oval ipaubos na usab sa major repair ug mangimbitar sila og independent surveyor nga maoy mo-supervise sa lining aron masiguro nga dili na mahitabo ang maong discrepancies. (BANAT NEWS)