Dako ang tsansa

Misaka ang rating sa mga kandidato pagka senador ilalum sa partido nga giumol ni kanhi presidente Rodrigo Duterte kinsa atoa karon napriso sa The Hague sa The Netherlands ilalum sa International Criminal Court.

Tungod ba kaha kini sa simpatiya sa katawhang Pilipinhon.

Apan dili malilong nga misaka gayud ang kumpiyansa sa mga botante ngadto sa pipila ka kandidato sa kanhi presidente.

Gumikan niini, kun kining bag-ong kalamboan ang basihan, akong pangagpas nga modaug gihapon silang Senador Bong Go ug Senador Bato Dela Rosa sa umaabot nga bugnong lugaynon sa Mayo 12.

Ilabina ni Senador Go kinsa nag-una kanunay sa mga survey sa mga senatoriables. Consistent si Go nga anaa sa top 5 sa survey hinungdan nga dako ang tsansa nga modaug gihapon kini sa sunod eleksiyon.

Gani, sa labing ulahing survey sa mga senatoriables sa Pulse Asia, Social Weather Station ug sa Boses ng Bayan sa RPMD, nag-una si Senador Go sa tanang kandidato pagka senador sa umaabot nga piniliay.

Hinuon, sa laing bahin, dili na kini ikatingala pa. Dili malalis nga daghan ang mibilib kang Senador Go tungod sa epektibo niyang programa nga daghang kabus gikan sa Luzon hangtud sa Mindanao ang natabangan.

Ang Malasakit program nga gipasiugdahan ni Senador Go mitabang og liboan ka mga pobreng pasyente nga walay ikabayad sa mga pampublikong tambalanan sa nasud sukad pa sa pagkahimugso niini.