Comelec mahilig sa black magic

Pag-arangkada pa lang sa online voting nga gipahigayon sa gawas sa atong nasud alang sa mga kaigsuonan tang botante, Overseas Filipino Workers (OFW), may nangreklamo gilayon kay inig pindot nila sa QR code para masusi kon natatak ba ang straight Duterte ten senatorial candidates nga ilang gibotaran, lahi ang mga pangalang mogula – sa mga kaatbang, sakop sa Team-Marcos. Usab, may nagrambol mga letra, numero ug karakter nga dili gayod mabasa. Mga kahibulongang inalisngaw nga makahulmag negatibong pagduda.

Mipahayag si Commission on Election (Comelec) Chairman George Garcia, nga kini wala kunoy kaso sanglit gituyo nila ang pagtaod niining gitawag niya’g encrypted code, usa ka security feature, (nga susamag safety box), aron kapanalipdan ang sagradong botos sa mga botante ug malikayan ang vote-buying. Usab mipasiatab, Comelec ra kunoy bugtong makasabot-makahubad sa encrypted QR code.

Total, matud niya, makita ra man tanang kandidatong gibotaran sa botante diha sa ilang sistema. Pero, human na sa pinilay. Aw, bati gihapon!  Bahaw na!

Kining pamaagi sa Comelec kaamgid sa black magic nga ipasundayag sa mga madyikero. Diin, usa ka guwapa-seksing babaye, kinsa nagbarog ibabaw sa dakong kahon, iyang ipresentar ngadto sa mga nanan-away.

Tapos, magkuha siyag itom habol ug salipdan ang babaye. Unya, may yamyamon kunohay siya dungan ang pagpakurogkurog sa habol ug sa kalit, mosiyagit: “Prestooo!!!” dungan ang pagwalis sa habol.

Haskang tingalaha sa katawhan, kay ang babaye nawala. Ug dihang giablihan ang kinandadohang kahon, didto na ang babaye sa ilawom.

Ang itom habol maoy sekretong instrumentong nagmalamposon ang madyik. Kay kon wala pa kini gisalipod, seguradong makita sa katawhan ang ilang gibuhat likod sa habol.

Mao sab kini ang posibleng mahitabo sa atong botos. Kay tungod sa encrypted code, tagoanan sa botos, dili nato makita ang atong gibotaran. Adto na kini masusi sa laing gibutangan. Unya, human pa sa piniliay itugot.

Dili ba kuyaw nga ma-black magic sa Comelec atong midterm election?  Kaanugon sa daghang campaign rally nga gipatud-ag, singot, luha, daginotong election machineries sa mga good-governance lovers, kinsa gustog malamboong kausaban sa atong nasod, nga lupigon ra man diay sa mga daotan sa ingon niining kasayon?

Hinuon, lubos pangagpas-opinion ra kining akoa. Unta, dili matinuod!