EDITORYAL - Walag tuo nga vote buying

Nagkadaghan na ang mga post diha sa social media bahin sa matud pa vote buying nga nahitabo diha sa komunidad nunot sa nagsingabot nga eleksyon karong adlaw nga Lunes, Mayo 9,2025.

Dili na kini bag-o, apan nagpakita lang kini nga ingon ani na kahugaw karon ang politika ilabi na matag dunay eleksyon dinhi sa nasud.

Dili na ba gyud paigo para sa mga botante ang katakos ug abilidad sa mga kandidato aron mobotar nila? Kay kinahanglan naman silang paliton sa baratong presyo?

Dunay daghang nikatap nga mga hulagway diha sa social media nga giingong pagpamalit og botos, kwartang papel nga gisulod og sobre nga dunay pasupot nga listahan sa mga pangalan sa kandidato.

Ang uban, usa ra ka pangalan sa kandidato nga gipataptan og tag P1,000, hangtud sa P50. Gani duna pay P20.  Ingon niana kaubos ang pagtan-aw aning mga kandidato sa mga botante nga gusto nilang paliton, baratilyo.

Apan maayong dili lang gyud dayun motuo ani kay posibleng mugna-mugna ra pud ni sa mga kaatbang aning mga politikong ‘nasakpang’ namalit og boto.

Apan subo lang paminawon nga ingon ana lang kabarato ang boto. Tulo ka tuig silang magdawat og sweldo gikan sa buhis sa mga tawong ilang napalit.

Sulod sa tulo ka tuig, kuwang ra ang P1,000 nga presyo sa boto sa dawatong pila ka milyon ka pesos nga sweldo aning mga kandidatong namalit og botos.

Ang  P1,000 dili ra abtan og usa ka adlaw gastuhon sa botante, apan kining mga kandidatong namalit og botos kun maoy padag-on, tulo ka tuig silang malipay-lipay sa sweldo, wala pay labot ani unya ang mga matud pa ‘padangog’ ug kurapsyon sa mga proyekto ug programa  gamit ang pundo sa katawhan. Dili maayong panag-ingnan o ehemplo sa kabataang henerasyon karon kining gipakitang kahugaw sa mga politiko karon.

Kun magpadani sa vote buying, wala lang untay reklamohay ini og walay ayo nga penerbisyo ang buhaton aning mga politikoha kun simbako silay makadaog.