Gura napakyas sa iyang misyon didto sa Japan

CEBU, Philippines — Si Yeroge “The Scientific” Gura sa ARQ Stable napakyas sa iyang kampanya alang sa World Boxing Council (WBC) Youth super flyweight title human siya miyukbo pinaagi sa unanimous decision sa mga kamot sa Hapon niyang karibal nga si Ayumu Sano niadtong Domingo, Hunyo 23, didto sa Twin Messe sa Shizuoka, Japan

Ang 21-anyos nga si Gura mipakita og igong katakos samtang mi-away sa teritoryo sa iyang kontra apan nabiyaan gyud siya sa puntos sa mas agresibong si Sano human sa 10 ka hugna nilang binukbukay.

Ang opisyal nga iskor mao ang 97-93, 99-91 ug 98-92, tanan alang sa Sano nga miinat sa perpekto niyang rekord ngadto sa 9-0-1 uban ang 4KOs.

Si Gura nakatilaw sa una niyang pilde ug natagak ngadto sa 8-1-1 uban ang 3KOs.

Siya maoy ikatulong boksidor sa ARQ nga naparot didto sa Japan sunod nilang Johnpaul "Angas ng Cebu" Gabunilas ug Rodex "The Tank" Piala.