Balaod batok paugat
Kon magpaugat silang Cebu City Mayor Nestor Archival, Cebu Governor Pam Baricuatro ug ubang lokal nga mga opisyal nga gipasanginlang nipakatap og motorcycle escorts o nag-wangwang aron pagpadaplin sa mga sakyanan nga nag-una nila sa kadalanan, bisan sa mga pagsaway sa abuso ug pakauwaw, makalapas sila og dili lang usa kon dili lima ka mga balaod:
1. Memorandum ni kanhi Presidente Joseph Estrada niadtong 1998 nga nideklarar nga ang pagsugo sa motorcycle escorts aron pag-abog sa mga motorista ug mga tawo nga naglakaw sa kadalanan usa ka salawayon nga buhat sa usa ka demokratikanhong nasud kansang mga molupyo managsama atubangan sa balaod. Gidid-an sa memorandum ang mga opisyal sa gobyerno ug pribadong mga indibiduwal sa paggamit og police escorts, sirens, blinkers, ug markers, gawas lang sa Presidente, Bise Presidente, Senate President, House Speaker ug Chief Justice.
* * *
1. Republic Act 6713, ang Code of Conduct and Ethical Standards for Public Officials sa 1989, nga nagsugo nilang Archival, Baricuatro ug kaubanan sa pagpahimutang sa interes sa publiko ibabaw sa personal nga interes ug sa paggamit sa kahimanan sa gobyerno sa labing epektibo ug makiangayon nga paagi. Gisugo sab ang mga opisyal sa pagpugong sa ilang kaugalingon sa paghimo og mga lakang nga sukwahi sa kaluwas ug interes sa publiko.
2. Republic Act 4136, ang Land Transportation and Traffic Code sa 1964, nagdili sa pagbabag sa trapiko. Ang Section 54 nitakda nga ang usa ka drayber dili mahimong mogamit sa iyang sakyanan aron pagbabag sa pag-agi sa ubang mga sakyanan. Gidili sab ang paggamit og sirens ug samang kahimanan sa mga sakyanan gawas lang sa police cars, ambulansiya ug fire trucks.
* * *
1. Presidential Decree No. 96, nga gipirmahan ni anhing Presidente Ferdinand Marcos Sr. sa Enero 13, 1973, nideklarar nga ilegal ang pagpanag-iya og sirens, bells, horns, whistles, domelights, ug blinkers, gawas lang sa mga sakyanan sa militar, kapolisan, National Bureau of Investigation, Land Transportation Commission (karon LTO), kabomberohan ug mga ospital.
2. Joint Administrative Order No. 2014-01, nga giluwatan sa Department of Transportation and Communication (karon DOTr), LTO ug Land Transportation Franchising and Regulatory Board niadtong 2014, nagsugo nga ang kalapasan silotan og multa nga P5,000 ug pagsakmit sa gidili nga kahimanan.
* * *
- Latest
