Kaso ni Martin: Lig-on o salida?
Dihang natudlo siyang Ombudsman sa Oktubre sa niaging tuig, kumbinsido na si Boying Remulla nga si Martin Romualdez ang usa sa labing dakong kawatan sa ?1.7 trilyones nga flood-control scandal. Kay lisod tuohan nga nag-piyesta ang kinawatay ang mga kongresista nga walay labot ang kanhi House speaker.
Pero si Romualdez iyang kauban sa fraternity sa University of the Philippines (UP) ug ig-agaw igtagsa sa nagtudlo niya nga si Presidente Ferdinand Marcos Jr. Labing dako niyang problema: Walay gipirmahan si Romualdez nga bisan usa ka dokumento sa flood scam.
* * *
Wala hinuon kini makapugong ni Remulla sa pagpasalig sa mga nanambong sa usa ka law forum sa UP, nga naglakip ni Professor Solita Monsod, nga mohipos siya og mga ebidensiya batok ni Romualdez sa mosunod nga unom ngadto sa siyam ka buwan.
Orihinal niyang teoriya mao nga si Romualdez nigamit sa binilyon ka pesos nga kickback aron pagpalig-on sa iyang pagkontrolar sa mga kongresista, nga gipaabot nga makatabang sa iyang ambisyon sa politika (apil nang pagdagan pagka presidente sa 2028 o pagka primero ministro kon makalusot ang charter change).
* * *
Tuod man, nirekomendar ang mga imbestigador sa Ombudsman og mga kasong plunder ug money laundering batok ni Romualdez niadtong Abril, unom ka buwan human himoa ang saad ni Remulla. Sa niaging semana nisumiter sila og dugang mga ebidensiya.
Apil sa ilang pasangil, nga tubagon ni Romualdez sa preliminary investigation, mao nga gigamit niyang sapaw-sapaw nga mga kompaniya aron sa pagbalhin-balhin sa kinawat nga kuwarta nga gipamalit og mahalon nga mga yuta ug kabalayan.
* * *
Gigamit sa Ombudsman ang affidavits sa walo ka kanhi marines nga nangangkon nga nihatod og mga maleta sa kuwarta. Apil sila sa mas dakong grupo nga nihingalan nilang Marcos Jr. ug ubang mga opisyal sa gobyerno. Pero ang gituohan sa Ombudsman mao rang pasangil batok nilang Romualdez ug kanhi kongresista Zaldy Co.
Kumbinsido ba si Remulla nga makabarug ang mga ebidensiya batok ni Romualdez sa Sandiganbayan? O gidalidali lang sa pagpasaka ang mga kaso aron makasulti ang presidente sa iyang State of the Nation Address ugma nga nakasipong og dakong isda ang iyang kampanya batok sa labing dakong kawat sa kasaysayan?
- Latest
