Bunal sa pagpanggukod
Nahibawo ka ba unsay labing dakong rason nganong hangtod karon padayong nituo ang mga dumadapig ni Bise Presidente Sara Duterte sa nangangkon nga mga kanhi marines (bisan kon pila nila wala mahimong sundawo ug kasaagaran nila nataktak tungod sa mga atraso)?
Nakabantay ka ba ngano nga ang bag-ong liderato sa Senado, imbes motingob sa ilang atensiyon pagbanhaw sa kaligdong sa institusyon, nagsige lang gihapon og panghimakak sa pasangil ni kanhi Senate President Alan Peter Cayetano nga ilang tabonan ang labing dagkong kawatan sa P1.7 trilyones nga flood control scandal?
* * *
Tubag sa duha ka pangutana sa ibabaw: Kapakyas sa administrasyon ni Presidente Ferdinand Marcos Jr. sa pag-imbestigar, pagkiha, pagpapriso, pagsilot ug pagbawi sa mga kinawat sa tanang apil sa konsabo sa ghost ug substandard projects nga imbes mobadlong nipasamot na hinuon sa baha.
Dul–an sa tuig human sa “Mahiya naman kayo!” nga State of the Nation Address (SONA) ni Marcos, usa ra ka incumbent nga senador ang napriso, wala pay incumbent nga kongresista ug cabinet member (sila rang kanhi Kongresista Zaldy Co ug kanhi Department of Public Works and Highways Secretary Manuel Bonoan) ang nakasohan.
* * *
Mas mabatyagan sa mga Sugbuanon ang pagbudhi ni Marcos sa pasidaan nga walay pasayluon sa kampanya, bisan iyang kaparyentihan: Hudlat rang pagkiha ni kanhi House Speaker Martin Romualdez ug gipa-resign ra, wala gani ipatawag og imbestigasyon, silang kanhi Budget Secretary Amenah Pangandaman, kanhi Executive Secretary Lucas Bersamin ug kaubanan.
Walay nakiha ug nasilotan sa mga kongresista ug mga opisyal sa DPWH ug mga kontraktor nga gipasanginlang nagbinuang sa P50 bilyones nga flood control projects sa Sugbo.
* * *
Ambot unsay dagway nga i-atubang ni Marcos sa iyang SONA karong Hulyo 27. Kon silang Senador Jinggoy Estrada, kanhi Senador Bong Revilla ug magtiayong Discaya ray ikapakita nga nadutlan sa iyang saad pagbadlong sa labing dakong kawat sa kasaysayan.
Maong saba gihapong pasangil sa mga maleta batok sa iyang administrasyon. Dili tungod kay dunay napakita nga katuohang mga ebidensiya. Kon dili tungod sa dili malalis nga kamatuoran nga imbes tarungon ang kampanya batok sa flood scam gihimo na hinuong bunal pag-apiki sa iyang mga kaatbang, apil ang pagduso sa impeachment ni VP Sara.
- Latest
