Premyo sa pagbalitok

Nahibawo kitang tanan nganong nibiya si Senador Chiz Escudero sa grupo ni kanhi Senate president Alan Peter Cayetano niadtong Hunyo 3 ug nganong ni-anunsiyo si Senador Joel Villanueva niadtong Domingo nga motambong siya sa special session karong semanaha: Dili sila gusto nga mapriso sama ni Senador Jinggoy Estrada.

Bahala na si Chiz nga nangangkon nga ganahan lang siya nga moluwas sa institusyon sa Senado. Pasagdi na lang sab si Joel nga niingon nga igo lang siyang motuman sa balaanong sugo sa Konstitusyon. Nahibawo kitang tanan unsay tinuod nilang motibo.

Kay ilang aktuwal nga aksiyon nisukwahi sa ilang sulti:

•Kon tinuod pang nagpakabana si Chiz sa pagpreserbar sa kaligdong sa institusyon, wala unta siya moyaka sulod sa upat ka buwan sa articles of impeachment batok ni Bise Presidente Sara Duterte sa niaging tuig; ug

•Kon tinuod pang nitahud si Joel sa mga probisyon sa 1987 Constitution, wala unta siya ni-apil sa pagpamakak nga gi-atake ang Senate building niadtong gabii sa Mayo 13 ug sa pag-boykot sa tulo ka sunudsunod nga mga sesyon sa Senado niadtong Hunyo 1, 2, ug 3.

Niaging tuig pa nga nanghulga si Ombudsman Boying Remulla nga hinog nang mga ebidensiya ug mapasaka nang mga kasong pagpangawkaw nga walay piyansa batok sa mga senador ug mga kongresista nga gipasanginlan sa dakong kawat sa flood-control projects.

Wala matinuod ang pasidaan nga mangapriso na sila sa wala pay Pasko sa niaging tuig. Mao tingaling nagtuo ang mga hingtungdan nga kutob ra sa istorya ang administrasyon. Hangtod nga gidakop si Jinggoy sulod mismo sa Senado.

Ang kakuwang og kadasig nilang Chiz ug Joel sa pag-ipon sa bag-ong majority bloc nga nipaluyo ni Acting Senate President Win Gatchalian nagtimaan nga wala pang kadawat og pasalig sa Malacañang nga tablahon ang ilang mga kaso.

Atong mahibaw-an kon bugtian ba sa administrasyon ang pagbalitok pinaagi sa paglangay na sab sa mga kaso. Labi na atubangan sa kahadlok nga ma-inutil ang impeachment court kon mapriso ang mga senador nga may kaso sa flood-control scam o sa International Criminal Court. Dili kinahanglan nga dunay laing maposasan. Usahay, ang hudlat sa pagka-priso sama og epekto sa aktuwal nga pagkapriso.