Pagka-inutil sa Senado
Niang lista sa mga kontrobersiya nga nakapa-inutil sa Senado human nasakmit ni Alan Peter Cayetano ang liderato.
Mayo 11: Pag-insistir sa majority bloc nga ipaubos si Senador Bato dela Rosa sa Senate protective custody (bisan wala itugot sa balaod ug sa ilang mga lagda) ug pagtanggong sulod sa pila ka oras sa mga ahente sa National Bureau of Investigation (NBI) nga ni-serve sa arrest warrant sa International Criminal Court;
Gabii sa Mayo 13: Pagpabuto sa mga guwardiya sa Senado nga gipangulohan ni retired Maj. Gen. Mao Aplasca (classmate ni dela Rosa sa Philippine Military Academy) puntirya sa bungbong nga bildo sa Senate building tungod sa pasangil nga gi-atake sila sa mga ahente sa NBI, nga nahibaw-an sa imbestigasyon sa Criminal Investigation and Detection Group (CIDG) sa Philippine National Police (PNP) nga dili tinuod;
-o0o-
Kadlawon sa Mayo 14: Nigawas si dela Rosa sa Senate building sa Pasay sakay sa sakyanan ni Senador Robin Padilla (may mga ebidensiya ang CIDG nga gikuyogan sila sa patrol car sa Pasay police ug sakyanan sa uyoan ni Padilla ang gibalhinan ni dela Rosa pag-abot nila sa Makati);
Mayo 26: Gisuwayan sa majority bloc sa pagpalusot ang remote voting amendment sa Senate rules nga gidudahang gituyo aron katugotan silang dela Rosa ug mga senador nga posibleng mapriso sa pag-apil sa umaabot nga mga deliberasyon ug botasyon sa Senado, apil nang impeachment trial ni Bise Presidente Sara Duterte. Walay botasyon nga nahimo tungod sa walkout sa minority bloc;
-o0o-
Abril 1: Bisan sa pagbabag ni Cayetano ug init nilang lalis ni Interior Secretary Jonvic Remulla, gidakop sa CIDG si Jinggoy Estrada sa alas-3:30 sa hapon pinasikad sa arrest warrant sa Sandiganbayan tungod sa kasong plunder. Giboykot nilang Cayetano ug sa majority bloc ang sesyon sa alas-5 sa hapon uban ang katin-awan pinaagi sa Facebook Live nga nakigbisog sila para sa kagawasan sa Senado.
Abril 2: Ikaduhang adlaw sa boykot sa majority nga gipasabot ni Cayetano sa laing Facebook Live nga panimawos sa walkout sa minority bloc niadtong Mayo 26 ug gitumong aron nga dili malahugay ang mga komitiba ug makanselar ang ilang imbestigasyon sa flood control scam sa Abril 4.
- Latest
