Landers Supermarket, nasunog

MANILA, Philippines — Tinupok ng apoy ang sangay ng Landers Supermarket sa Fairview, Quezon City, kahapon ng madaling araw na umabot sa 5th alarm.

Sa inisyal na imbestigasyon ng Bureau of Fire Protection (BFP), bandang alas-4:44 ng madaling araw nang magsimula ang sunog sa naturang supermarket na matatagpuan sa Belfast Ave. corner Quirino Highway sa Brgy. Pasong Putik ng nabanggit na lungsod.

Nagdulot naman ng pagsisikip ng daloy ng mga sasakyan ang nangyaring sunog na idineklarang fire under control bandang alas-10:48 ng umaga.

Nasa 80 ­porsiyento ng establisimyento ang nasira kabilang ang nag-collapsed na mga pader. Na­ngangamba naman ang mga katabing residente sa kanilang kaligtasan dahil sa patuloy na pagbagsak ng mga debris. Wala naman aniyang nasawi o nasaktan sa insidente.

Samantala, nasa hot water naman ang limang fire volunteers nang makita sa video na post ng isang Johnny Gaw Yu sa Facebook na na­ngunguha ng mga bote ng alak sa nasusunog na supermarket.

Ayon kay Supt. Anthony Arroyo, spokesman ng BFP, nagsasagawa na sila ng imbestigasyon upang matukoy ang mga pangalan at grupo ng limang fire volunteers na nagsamantala.

Nasa 30 grupo ng mga fire volunteers ang rumesponde sa sunog.