Kinamahalan nga pangopya

Kon tinuod nga balor og minilyon ka pesos ang kontrata nga gisudlan ni kanhi Presidente Rodrigo Duterte uban ni Nicholas Kaufman, aron maoy mangulo sa iyang depensa sa International Criminal Court (ICC), angay’ng apurahon nilang abogado pag-andam og orihinal nga mga argumento. Kay gipasanginlan si Kaufman nga nangopya lang sa:

Propaganda sa ilang troll army nga gidagit si Duterte ug gidam-ok sa The Hague tungod sa pamolitika ni Presidente Ferdinand Marcos Jr.; ug

Karaang petisyon ni Solicitor General Menardo Guevarra nga walay hurisdiksiyon ang ICC sa kaso ni Duterte.

* * *

Ambot nahibawo ba si Kaufman nga ang pasangil sa kidnapping dungan nga gipakatap sa 200 ka Facebook accounts nga klarong trolls niadtong Marso 11 human gidakop si Duterte, dayon gikopya nilang Kitty Duterte sa iyang Instagram post ug Bise Presidente Sara Duterte dihang gibabagan sa kapolisan sa gate sa Villamor Airbase.

Gigamit ni kanhi Executive Secretary Medialdea ang linya atol sa labing unang pag-atubang nilang Duterte sa ICC Pre-Trial Chamber 1 niadtong Marso 14. Giulog-ulogan ba lang ni Kaufman ang mga Duterte o hasta siya nabiktima sa ilang trolls?

* * *

Ang pagkuwestiyon ni Guevarra sa hurisdiksiyon sa ICC  niadtong 2023 gibasura na sa ICC appeals chamber. Pero nikapyot silang Medialdea sa dissenting opinion sa duha ka huwes sa appeals chamber nga walay hurisdiksiyon. Hinikalimtan nga ang mayoriya sa tulo ka huwes maoy nipatigbabaw sa pagtugot sa imbestigasyon.

Ambot nganong wala tambagi ni Kaufman si Duterte nga lupig ang dissenting opinion sa Article 29 sa Rome Statute: “The Crimes within the jurisdiction of the Court shall not be subject to any statute of limitations.”

* * *

Kon dayunon ni Kaufman paggamit ang gipahibawo nga mga argumento para sa iyang paukyab nga makagawas na si Duterte sa prisohan sa dili pa ang gitakdang husay unya sa Septiyembre 23:

Dako ang kahigayonan nga ipatigbabaw sa ICC ang ilang baruganan nga bisan nigawas si Duterte sa ICC nagpabilin ang ilang hurisdiksiyon sa mga krimen nga nahitabo dinhi sa katuigan nga sakop pang Pilipinas (2011-2019); ug

Madugangan ang listahan sa mga eskandalo ni Kaufman sa ICC (sama sa pakig-away sa iyang kliyente tungod sa bayad) sa labing mahalong “copy and paste” sa kasaysayan.

* * *

leolastimosa@gmail.com